Respýblıkalyq qan qyzmetiniń eriktileri Ermek Dúısenhanov pen Arman Satımov qan donorlyǵynyń mańyzdylyǵyn nasıhattaý úshin Qazaqstandy aralap, 17 kúndik avtosaparǵa shyqty. Ár qalada olar shaǵyn dárister ótkizip, aqparattyq materıaldar taratyp, jergilikti turǵyndarmen jáne BAQ ókilderimen kezdesýler uıymdastyrýda, dep habarlaıdy aqshamnews.kz
Marshrýt iri qalalardy ǵana emes, shalǵaı aýyldardy da qamtıdy, sebebi donorlyq — ár adam úshin qoljetimdi bolýy tıis.
Jobaǵa alty oblystyń ákimdikteri qoldaý kórsetip otyr. Qan ortalyǵynyń logotıpi bar kólikpen eriktiler Astana, Qostanaı, Hromtaý, Aqtóbe qalalaryn artta qaldyryp, Aqtaýǵa jetti.
Sonymen qatar, ambassadorlar ekologıa, tabıǵatty saqtaý, aýyldyq óńirlerdi damytý jáne tarıhı murany qorǵaý máselelerin de kóterýde.
«Mundaı bastamalar — bul tek donorlyqty ilgeriletý ǵana emes, bul qoǵamda janashyrlyq, qamqorlyq pen ózara kómektesý mádenıetin qalyptastyrýǵa qosqan úles. Biz óz eriktilerimizben maqtanamyz!», — deıdi Qan ortalyǵynyń basshysy Sánıa Ábdirahmanova.
Dáristerden keıin eriktiler qazaqstandyqtarmen birge Qan ortalyǵynyń logotıpi beınelengen arnaıy jabdyqtalǵan kólikke qyzyl núkteler japsyrady. Qazirdiń ózinde ondaǵan núkte japsyrylǵan jáne olardyń sany artyp keledi. Bul — donorlyq týraly biletin adamdar qatary kóbeıip jatqanyn bildiredi.
«Adam donor bolǵan kezde, ózin qajet, mańyzdy tulǵa retinde sezinedi. Ol ózinen kóp nárse táýeldi ekenin túsine bastaıdy jáne qoǵam ómiriniń ózge de máselelerine belsendi aralasady. Donor — bul júıe onsyz jumys isteı almaıtyn adam. Bir jerde bireýdiń ómirin dál sol adamnyń qany saqtap qalýy múmkin», — deıdi Qan ortalyǵynyń erikti-ambassadory Arman Satımov.