Almatyda kredıtter boıynsha merzimi ótken bereshekti qalaı retteýge bolady?
Óńirlik komýnıkasıalar qyzmetiniń alańynda bankrottyq jáne tólem qabilettiligin qalpyna keltirý rásimderi, qaryzdar men mıkrokredıtter boıynsha merzimi ótken bereshekti retteý tártibi týraly QR Qarjy naryǵyn retteý jáne damytý agenttiginiń Qarjy qyzmetterin tutynýshylardyń quqyqtaryn qorǵaý Departamentiniń dırektory Aleksandr Terentev aıtyp berdi, dep habarlaıdy almaty-akshamy.kz.
Onyń aıtýynsha, Qarjy naryǵyn retteý jáne damytý agenttiginiń baǵyttarynyń biri qarjy qyzmetterin tutynýshylardyń quqyqtaryn qorǵaýdy qamtamasyz etý bolyp tabylady. Agenttik tutynýshylardyń quqyqtaryn qarjy uıymdary tarapynan teris paıdalanýdan jáne josyqsyz praktıkadan qorǵaýdy qamtamasyz etý úshin qadaǵalaý rásimderin iske asyrady. Azamattardyń ótinishterine tereń taldaý júrgiziledi, taqyryptyq jáne qujattamalyq tekserýler uıymdastyrylady, anyqtalǵan buzýshylyqtardy joıý úshin qadaǵalaý sharalary qabyldanady.
«2023 jyly Agenttik azamattar men zańdy tulǵalardan kelip túsken 59,4 myńnan astam ótinishti qarady. Ótinishterge jasalǵan taldaý kórsetkendeı, qarjylyq qyzmetterdi tutynýshylardyń quqyqtaryn buzýdyń kópshiligi kredıtorlardyń azamattardyń merzimi ótken bereshegin retteý boıynsha sharalar qabyldamaýy boldy: banktik qaryzdar men mıkrokredıtter boıynsha (tıisinshe 53% jáne 29%). Ótinishterdiń 19%-y qarjy naryǵynyń basqa sýbektileri boıynsha», - dedi Aleksandr Terentev.
Anyqtalǵan buzýshylyqtar boıynsha 2023 jyldyń basynan beri Agenttik qarjy uıymdaryna qatysty 224 shara qoldanyp, shamamen 189,9 mln teńge somasyna 159 ákimshilik jaza shyǵardy.
Onyń aıtýynsha, qarjylyq qyzmetterdi tutynýshylardyń quqyqtaryn qorǵaý maqsatynda 2021 jylǵy 1 qazannan bastap kredıttik uıymdardyń tólemge qabiletsiz qaryz alýshy – jeke tulǵalardyń bereshegin retteýdiń biryńǵaı zańnamalyq tártibi qoldanylady.
Sarapshy qaryzdar men mıkrokredıtter boıynsha merzimi ótken jaǵdaıda qaryz alýshylarǵa ne isteý kerektigin egjeı-tegjeıli aıtyp berdi.
2021 jylǵy 1 qazannan bastap Qazaqstanda kredıtti óteýde qıyndyqtarǵa tap bolǵan azamattardyń problemalyq bereshegin retteý tártibi qoldanylady. Bankter men mıkroqarjy uıymdary (MQU) ony oryndaýǵa jáne boryshkerlerdiń qaryzdary men mıkrokredıtterin qaıta qurylymdaýǵa ótinishterin qaraýǵa mindetti.
«2022 jyly kredıttik uıymdar qaryz alýshylardyń 708,7 myń ótinishin qarady, olardyń 74,5% -ynda - 527,8 myń qaryz alýshydp qaıta qurylymdaý maquldandy», - dep naqtylady sarapshy.
Sondaı-aq, Qarjy naryǵyn retteý jáne damytý agenttiginiń talaby boıynsha kredıttik uıymdar qaryzdar men mıkrokredıtter boıynsha merzimi ótken bereshekti retteýdiń mindetti tártibin eskeretin ishki normatıvtik qujattardy ózektendirgenin aıtty. Resmı ınternet-resýrstarda, áleýmettik jelilerde jáne mobıldi qosymshalarda bankter men MQU merzimi ótken bereshekti retteý tetigi týraly aqparatty ornalastyrady, sondaı-aq kredıtterdi qaıta qurylymdaý máseleleri boıynsha qaryz alýshylarǵa keńes berý úshin qosymsha jedel jelilerdi ashady.