Kredıttik alaıaqtyqqa qarsy is-qımyl tetikterin iske asyrý jol kartasy ázirlendi. Bul jaıynda Májilis depýtattarynyń saýalyna Qarjy naryǵyn retteý jáne damytý agenttigi tóraǵasynyń mindetin atqarýshy Nurlan Ábdirahmanovtyń jaýabynda aıtylǵan, dep habarlaıdy Almaty-akshamy.kz.
«Azamattardy alaıaqtardan qorǵaýdy arttyrý maqsatynda agenttik kredıttik alaıaqtyqqa qarsy is-qımyl tetikterin iske asyrý jónindegi jol kartasyn ázirledi», - dep atap ótedi ol jaýabynda.
Onyń atap ótýinshe, jol kartasy aıasynda:
1) qarjy uıymdarymen alaıaqtyq operasıalar jáne osyndaı operasıalarǵa tartylǵan adamdar boıynsha derekter aqparat almasý úshin Antıfrod-ortalyq qurý;
2) alaıaqtyq belgileri anyqtalǵan kezde klıenttiń ótinishi boıynsha aqshaǵa qoljetimdilikti toqtatý tártibin ázirleý;
3) kredıttik alaıaqtyqty, jalǵan shopıngti nemese ózge de zańsyz qyzmetti anyqtaýdyń onlaın júıesiniń bolýy boıynsha kredıttik búroǵa qoıylatyn talaptardy belgileý;
4) jeke tulǵalarǵa berilgen onlaın qaryzdar týraly aqparatty naqty ýaqyt rejıminde kredıttik búrolarǵa berý jónindegi talaptardy belgileý;
5) bankterge jáne MQU-ǵa onlaın kredıt alýǵa ótinimniń kelip túskeni, sondaı-aq onlaın kredıtti resimdeýge onyń rastamasyn alǵannan keıin ǵana klıenttiń shotyna aqsha aýdarý múmkindigi týraly klıentti habardar etý boıynsha talaptardy engizý;
6) onlaın rejımde mıkrokredıtter berý kezinde qarjy uıymdarynyń mobıldi qosymshalarynyń qaýipsizdigine qoıylatyn talaptardy arttyrý kózdelgen.
«Sonymen qatar, agenttik birinshi ret kirgen, qupıasózdi ózgertken jáne qaryz alǵan kezde mindetti bolatyn bıometrıany engizdi, qosymshanyń jumys isteý qaýipsizdiginiń buzylý belgileri anyqtalǵan kezde mobıldik qurylǵyny qol jetkizý quqyqtarynyń buzylý belgileriniń bolýy nemese qashyqtan basqarý jáne fýnksıonaldy buǵattaý prosesiniń bolýy turǵysynan tekserýdi júzege asyrdy», - dedi Nurlan Ábdirahmanov.