Qazaqstan jappaı sıfrlanǵan jáne jasandy ıntellekt júıesi qarqyndy damyǵan elge aınalýǵa tıis. Bul – bizdiń strategıalyq mindetimiz. Bul týraly Memleket basshysy Qasym-Jomart Toqaev Ulttyq quryltaıdyń úshinshi otyrysyndaǵy sózinde aıtty, dep habarlaıdy almaty-akshamy.kz Aqordanyń baspasóz qyzmetine silteme jasap.
«Kelesi qundylyq – jasampazdyq jáne jańashyldyq. Bul – óte jyldam ózgerip jatqan qazirgi álemde ulttyń básekege qabiletti bolýynyń basty sharty. Ozyq damyǵan memleket qurý úshin bizdiń azamattarymyz jańasha oılaı bilýge jáne jasampazdyqqa umtylýy kerek. Sol sebepti, biz qoǵamda bilimpazdyqty dáripteýge, bilim jáne ǵylym salasyn damytýǵa basa mán berip kelemiz.
Biz adam kapıtalyna arqa súıesek, ózimiz belgilegen aýqymdy ózgeristerdiń bárin júzege asyra alamyz. Elimizde talantty azamattar az emes. Olar tyń amal-tásilder qoldanyp, batyl sheshimder qabyldaǵanynyń arqasynda túrli salada zor tabysqa jetip júr.
Sońǵy jyldary kreatıvti ındýstrıa qarqyndy damyp keledi. Qazaqstannyń mádenı tolqyny keń qanat jaıyp, órenderimiz aımaqtyq jáne jahandyq deńgeıde tanyla bastaǵany kezdeısoqtyq emes. Ultymyzdyń orasan zor jasampazdyq áleýeti kıno, mýzyka, ádebıet jáne ónerdiń basqa da jańa salalarynda aıqyn kórinis tapqan. Kreatıvti ındýstrıa ekonomıkamyzdy órkendetýge tyń serpin beretinine senemin.
Elimiz birtindep postındýstrıaldy qoǵam úlgisine kóship keledi, ıdeıa men ınovasıa onyń basty qozǵaýshy kúshi sanalady. Biz ozyq tehnologıalarǵa negizdelgen bilim ekonomıkasyn qurýymyz qajet. Qazaqstan jappaı sıfrlanǵan jáne jasandy ıntellekt júıesi qarqyndy damyǵan elge aınalýǵa tıis. Bul – bizdiń strategıalyq mindetimiz. Osy tehnologıa taıaý bolashaqta álemdi túbegeıli ózgertedi.
Biz barlyq salada sıfrly nomadtar órkenıetiniń ozyq standarttaryna saı bolýymyz kerek. Jastarymyzdyń áleýeti men mentalıteti, qarym-qabiletine qarasaq, «Qazaqstannyń qaryshty qadamyn» jasaýǵa bizdiń tolyq múmkindigimiz bar ekeni baıqalady. Basqa-basqa, biraq dál osy jerde batyl qımyldap, qulashymyzdy keń sermeýden qoryqpaý kerek», - dedi Memleket basshysy.