Sheteldik psıhıatr Iago Fernandestiń aıtýynsha, kóz jasyn tyıý men emosıalardy jasyrý densaýlyqqa edáýir zıan tıgizýi múmkin.
Ol Metropoles basylymyna bergen suhbatynda bul ádet ımýnıtetti tómendetip, adamdy túrli psıhologıalyq jáne fızıkalyq syrqattarǵa beıim etetinin aıtty, - dep habarlaıdy aqshamnews.kz.
Fernandestiń sózinshe, emosıalardy tejeý olardyń joǵalýyna ákelmeıdi. Kerisinshe, ishte saqtalǵan sezimder aǵzanyń strestik júıesin belsendirip, ony únemi joǵary «daıyndyq» kúıinde ustaıdy. Bul óz kezeginde mazasyzdyq, kúızelis, uıqysyzdyq sıaqty psıhologıalyq qıyndyqtarǵa alyp kelýi múmkin.
Sonymen qatar, emosıany syrtqa shyǵarmaý saldarynan aǵzada túrli fızıkalyq reaksıalar paıda bolady:
- sozylmaly aýyrsynýlar,
- álsizdik pen tez sharshaý,
- ımýnıtettiń tómendeýi.
Mamannyń aıtýynsha, jylaǵannan keıin aǵzada parasımpatıkalyq júıke júıesi iske qosylady. Ol qan qysymyn tómendetip, júrek soǵysyn baıaýlatady, sondaı-aq, stress saldaryn beıtaraptandyrady.
«Emosıalardy tejeýdiń ornyna olarǵa erik berý áldeqaıda paıdaly. Bul – psıhıkalyq ta, fızıkalyq ta saýlyqty saqtaý úshin mańyzdy», – deıdi Fernandes.
Emosıany saýatty shyǵarýdyń qarapaıym tásilderi:
- Psıhologtar emosıany ishte ustamaı, ony qaýipsiz jolmen shyǵarýdy usynady.
- Jylaýǵa múmkindik berińiz. Bul – tabıǵı reaksıa, ol aǵzany jeńildetedi.
- Áńgimelesińiz. Jaqyndaryńyzben oı bólisý emosıany jeńildetýge kómektesedi.
- Jazyp kórińiz. Kúndelik júrgizý ishki sezimderdi qaǵazǵa túsirýge jaqsy ádis.
- Qozǵalys jasańyz. Jaıaý júrý, sport nemese tynys jattyǵýlary stresti azaıtady.
- Shyǵarmashylyqqa bet buryńyz. Sýret salý, mýzyka tyńdaý nemese basqa hobbıler emosıany syrtqa shyǵarýdyń tıimdi joly.