Qonaev qalasy men Almaty oblysynyń Kegen aýdanynda eki kovorkıng-ortalyq ashyldy, dep habarlaıdy almaty-akshamy.kz
Ortalyqtardyń ashylý saltanatyna QR Mádenıet jáne aqparat mınıstrligine qarasty Jastar jáne otbasy isteri komıtetiniń tóraǵasy Qaırat Qambarov, memlekettik, jastar jáne zertteý uıymdarynyń ókilderi qatysty.
Bul jerden jastar psıhologıalyq jáne zańgerlik qoldaý, qarjylyq saýattylyq, NEET sanatyndaǵy jastardy jumysqa ornalastyrý máseleleri boıynsha keńes ala alady.
«Mınıstrlik jastar saıasatyn damytýǵa erekshe kóńil bóledi. Kovorkıng-ortalyqtar óńir jastaryn áleýmettendirýde mańyzdy septigin tıgizedi. Bul alańdarda tegin bıznes-trenıngter, master-klastar, kezdesýler, kórmeler jáne basqa da mańyzdy is - sharalar ótkiziledi», — dedi Qaırat Qambarov.
Esterińizge sala keteıik, Úkimet 2023-2029 jyldarǵa arnalǵan Memlekettik jastar saıasatynyń tujyrymdamasyn bekitti, onyń sheńberinde Qazaqstanda aýyl jastaryn damytý jáne jan-jaqty qoldaý úshin jaǵdaı jasaý jóninde naqty sharalar qabyldanýda.
Osylaısha, óńirlerde 900 myńǵa jýyq jasty sıfrlyq saýattylyqqa úıretý, «Táýelsizdik urpaqtary», «Zhas project» óńirlik granttaryn bólý josparlanýda. Basqa da organdarmen birlesip, jastardy turǵyn úımen qamtamasyz etý baǵdarlamalary iske asyrylady.
Jumys sapary barysynda komıtet tóraǵasy Almaty oblysynyń jastarymen birqatar kezdesý ótkizdi.
QR Mádenıet jáne aqparat mınıstrliginiń baspasóz qyzmeti