Londonda Dúnıejúzilik bilim forýmy ótip jatyr
«Pandemıa kezinde mektepterdi japqanymyz durys bolmady». Londonda ótken Búkilálemdik bilim forýmynda sóz alǵan sarapshylar osyndaı tujyrym jasady, dep habarlaıdy Almaty-akshamy.kz Qazaqtv.com saıtyna silteme jasap.
Ulybrıtanıa Úkimetiniń qoldaýymen uıymdastyrylǵan jıynǵa qazaqstandyq delegasıa da qatysyp, kovıdten keıingi bilim berý júıesin jetildirý joldaryn talqylaýda. Álemniń 115 elinen jınalǵan sarapshylar bilim berý sapasy men ınklúzıvtigin arttyrý boıynsha jańa usynystarymen bólisýde.
"Bul - bilim salasynyń birinshi basshylarymen tájirıbe almasyp, baılanystar ornatýdyń birden-bir múmkindigi. Mańyzdysy - bir-birimizden úırenip, jetistikterimizdi salystyrýǵa jaǵdaı jasalyp otyr. Bul basqosý, ásirese, kovıdten keıin óte erekshe mánge ıe bolyp tur. Óıtkeni pandemıa kezinde kóptegen memleketterdiń bilim júıesiniń sapasy tómendep ketkeni ras", - deıdi Brıtan keńesiniń Qazaqstan jáne Ortalyq Azıa boıynsha dırektory Erık Lorı.
"Qazaqstan pandemıa kezindegi bilim sapasynyń deńgeıine IýNISEF-pen birge taldaý jasady. Ázirge onyń qorytyndysy ázir emes. Alaıda alǵashqy nátıjeleri kóńil kónshitpeıdi", - deıdi sarapshy.
"Muǵalimderden saýalnama alyp bastadyq. Sol saýalnamalardyń alǵashqy nátıjelerine qarasaq, muǵalimder pandemıa kezinde balalardyń bilim sapasy tómendedi degen jaýaptardy bizge berip jatyr. Ekinshi baǵyt oqýshylardyń naqty oqý jyly kezinde alǵan baǵalaryn pandemıaǵa deıin, pandemıa kezinde jáne pandemıadan keıin, osy úsh ýaqytta alyp salystyryp, jaqyn arada alatyn bolamyz", - deıdi «Aqparattyq-taldaý ortalyǵy» AQ basqarma tóraǵasynyń mindetin atqarýshy Maǵjan Amanǵazy.