Vırýs ana sútinde kezdespeıdi.
Analar bala emizýdi COVID-19-ben aýyrǵan kezde de, vaksınadan keıin de jalǵastyra alady. Dúnıejúzilik densaýlyq saqtaý uıymynyń mamandary osyndaı málimdeme jasady, dep habarlaıdy Almaty-akshamy.kz
Zertteýlerge sáıkes, bul aýrýdy týdyratyn SARS-CoV-2 vırýsy ana sútinde tabylǵan joq. Sonymen qatar, ananyń alǵan vaksınasy balaǵa qaýip tóndirmeıdi.
DDU sarapshylarynyń aıtýynsha, ımmýnızasıadan keıin ana sútinen koronavırýsqa qarsy antıdeneler tabylǵan, ol balany aýrýdan qorǵaı alady.
«Úsh balasyn da emizip ósirgen ana retinde men emshek súti náreste úshin eń jaqsy tamaqtaný kózi ekenin bilemin, tipti anasynyń COVID-19 juqtyrǵany rastalsa da. Eger aýrý juqtyrǵan ana tıisti saqtyq sharalaryn qoldansa, ol balasyn emizýine bolady», - dep BUU jańalyqtarynyń baspasóz qyzmeti DDU Eýropalyq aımaqtyq keńsesiniń eldik strategıalar men densaýlyq saqtaý júıesi bóliminiń dırektory Natasha Azzopardı-Mýskatqa silteme jasap habarlady.
Mamandar emshek sútiniń qurylymy týraly da aıtty.
«Emshek sútinde náresteni tynys alý joldarynyń aýrýlarynan qorǵaıtyn antıdeneler men basqa ımmýnologıalyq elementter bar. Balanyń ósýi, damýy men densaýlyǵy úshin emshek sútiniń mańyzdylyǵyn rastaıtyn kóptegen dálelder bar, sonymen qatar ol ómirdiń sońyna deıin semizdik pen juqpaly emes aýrýlardyń aldyn alýǵa kómektesedi», - dep qosty ol.
DDU sarapshylary COVID-19 juqtyrǵan emizetin analarǵa tamaqtandyrý kezinde maska kıýdi, nárestege jaqyndamas buryn qolyn sabynmen muqıat jýýdy jáne qoldanystaǵy zattardy dezınfeksıalaýdy usynady.
Álem boıynsha balany emshek sútimen qorektendirý Dúnıejúzilik densaýlyq saqtaý uıymynyń postkeńestik elderdi qamtıtyn Eýropalyq aımaǵynda eń tómengi kórsetkishke ıe. Eýropadaǵy nárestelerdiń tek 13% -y ǵana ómiriniń alǵashqy alty aıynda tek emshek sútin eme alady.