Qazaqstan ulttyq quramasynyń sportshylary Dúnıejúzilik kóshpendiler oıyndarynyń besinshi jarys kúnin tabysty aıaqtady, dep habarlaıdy aqshamnews.kz.
Kókpardan Qazaqstan ulttyq quramasy Qyrǵyzstan komandasyn 5:4 esebimen jeńip, altyn júldege ıe boldy. Al kók bórúden Qazaqstan komandasy Qyrǵyzstan quramasyna 4:10 esebimen ese jiberip, kúmis júlde aldy.
Etnoaýylda teńge ilýden ótken jarysta Beknur Serikov – bes beles saıysynan, al Rahat Qambarov qos qulash saıysynan altyn júlde aldy.
Etnoaýylda qusbegilikten irikteý jáne jartylaı fınaldyq syn ótti. Ulttyq qurama sportshylary búrkit, qarshyǵa jáne suńqar salýdan fınalǵa shyqty.
«Arǵymaq» at-sport kesheninde ótken dástúrli sadaq atýdan jarys óz máresine jetti. Komandalyq saıysta Qazaqstan quramasy Aýstralıadan kelgen sadaqshylardan 2:3 esebimen jeńilip, kúmis júldege ıe boldy. Sadaqshylar Kóshpendiler oıyndaryn bir altyn, eki kúmis, bes qola júldemen aıaqtady.
Jaqsylyq Úshkempirov atyndaǵy Jekpe-jek saraıynda tatar halqynyń kóne ulttyq belbeý kúresi kóráshten erler arasynda tórt salmaq dárejesi boıynsha jarys ótti. Birjan Shaımerdenov (90 keli) altyn júlde alsa, Ádilet Shalǵynbekuly (64 keli) men Nurdáýlet Jarylǵapov (+100 keli) kúmis júldege ıe boldy. Beknur Bektaı (75 keli) qola júlde aldy.
«Alaý» muz saraıynda túrik halqynyń ulttyq kúresi ashyrtmaly aba gúreshinen bes salmaq dárejesi boıynsha jarys ótti. Qazaqstandyq úsh birdeı sportshy kúmis júldege ıe boldy. Olar Ernur Súleımen (60 keli), Ádilet Ahmetǵalı (70 keli), Aıdos Ǵalymov (90 keli).
«Alaý» muz saraıynda qyrǵyz halqynyń ulttyq oıyny ordodan Qazaqstan quramasy fınalǵa shyqty. Aqtyq báseke 13 qyrkúıek kúni ótedi.
«Dýman» qonaq úı jáne sport kesheninde Batys Afrıka halyqtarynyń zıatkerlik oı̆yny ovarıden ótken jarysta Ásel Dalıeva altyn júlde alsa, Ańsaǵan Qojanásip qola júlde ıelendi.