Bul týraly Májilistiń Áleýmettik-mádenı damý komıtetiniń otyrysynda Týrızm jáne sport mınıstri Ermek Marjyqpaev aıtty, dep habarlaıdy almaty-akshamy.kz.
Mańyzdy oqıǵa – elordada Dúnıejúzilik Kóshpendiler oıyndaryn ótkizý. Oıyndarǵa 100-den astam elden jalpy sany 3000-ǵa jýyq adamnan turatyn delegasıalar qatysady dep kútilip otyr. Búgingi tańda 75 el qatysatynyn resmı túrde rastady, - dedi ol.
Marjyqpaev atap ótkendeı, oyndarǵa bıletter satyla bastady. Búkil el boıynsha jarnamalyq naýqannyń "ekinshi tolqyny" bastaldy.
Sporttyq oıyn baǵdarlamasy 20 jarystyq jáne 10 kórneki sport túrin qamtıdy. 110 medal jıyntyǵy oınatylady.
Jarys at sporty, ulttyq kúres, sadaq atý, qusbegilik, dástúrli zıatkerlik oıyndar boıynsha ótedi.
Oıyndardy sapaly uıymdastyrý jáne ótkizý úshin mınıstrlik barlyq qajetti jumystardy júrgizip jatyr, - dedi Sport mınıstri otyrysta.
Sonymen birge el óńirlerindegi kúrdeli sý tasqyny jaǵdaılaryna baılanysty, sondaı-aq Memleket basshysynyń tapsyrmasy boıynsha búdjet qarajatyn únemdeý maqsatynda oıyndardy ótkizý shyǵyndaryn qysqartý máselesi qarastyrylyp jatyr dep túsindirdi mınıstr.
21 naýryzda Astana qalasynda 5-shi Dúnıejúzilik kóshpendiler oıyndarynyń keri sanaq taqtasy saltanatty túrde iske qosylǵanyn eske sala keteıik.
Bul is-shara Májilis tóraǵasy Erlan Jaqanuly Qoshanov bastaǵan birqatar depýtat, Dúnıejúzilik etnosport konfederasıasynyń prezıdenti Bilál Erdoǵan jáne mınıstrdiń qatysýymen ótken bolatyn.