Ǵylym kandıdaty dárejesi jáne qaýymdastyrylǵan profesor ataǵy úshin – 93 myń teńge, al doktor dárejesi úshin 185 myń teńge qosymsha aqy alatyn bolady.
Senat Májilis qabyldaǵan "Qazaqstan Respýblıkasynyń keıbir zańnamalyq aktilerine ǵylym jáne bilim berý máseleleri boıynsha ózgerister men tolyqtyrýlar engizý týraly" zańdy maquldady, dep habarlaıdy almaty-akshamy.kz.
Zańnyń negizgi maqsaty – ǵylym jáne bilim berý salasyndaǵy ulttyq zańnamany odan ári jetildirý.
"Qujat ǵylymı zertteýlerdiń tıimdiligin arttyrýdy, ǵalymdar úshin áleýmettik kepildikterdi jaqsartýdy jáne ǵylymdaǵy qarjy resýrstaryn paıdalanýdy ońtaılandyrýǵa baǵyttalǵan mehanızmderdi engizýdi, sondaı-aq merzimdi áskerı qyzmettiń belgilengen merzimin ótkergen azamattarymyzǵa bilim alýda birqatar jeńildikter berýdi kózdeıdi. Atap aıtqanda, zańda birqatar jańa ózgerister men tolyqtyrýlar qarastyrylǵan. Birinshiden, jergilikti atqarýshy organdarǵa ǵylym jáne ǵylymı-tehnıkalyq qyzmet salasyndaǵy memlekettik saıasatty iske asyrý quqyǵyn berý arqyly, óńirde ǵylymı jáne ǵylymı-tehnıkalyq jobalar men baǵdarlamalardy uıymdastyrý jáne iske asyrý boıynsha quzyretter beriledi", - dedi senator.
Ekinshiden, memlekettik joǵary jáne joǵary oqý ornynan keıingi bilim berý uıymdarynda ǵylymı-pedagogıkalyq qyzmetpen aınalysatyn pedagogtarǵa jáne ǵylymı-zertteý jumystaryn júrgizetin ǵylymı qyzmetkerlerge – ǵylymı ataǵy úshin 25 eselengen AEK-ke deıin jáne "profesor" – ǵylymı ataǵy úshin 50 eselengen AEK-ke deıin qosymsha aqy belgileý usynylyp otyr, dep jalǵastyrdy ol. Qazir bul sáıkesinshe 17 jáne 34 AEK bolyp belgilengen.
"Iaǵnı, ǵylym kandıdaty dárejesi jáne qaýymdastyrylǵan profesor (dosent) ǵylymı ataǵy úshin – 93 myń teńge, al beıini boıynsha doktor dárejesi jáne profesor ǵylymı ataǵy úshin – 185 myń teńge qosymsha aqy alatyn bolady. Sonymen qatar, JOO-larda jáne ǵylymı uıymdarda bes jyldan kem emes jumys isteıtin ǵalymdar úshin ǵylymı, ǵylymı-pedagogıkalyq jáne ǵylymı-tehnıkalyq sıpattaǵy jumystardy aıaqtaý úshin ortasha jalaqysyn saqtaı otyryp, 1 jylǵa deıin shyǵarmashylyq demalys alýǵa quqyq beriledi. Granttyq jáne baǵdarlamalyq-nysanaly qarjylandyrý jobalarynyń tıimdi oryndalýyn qamtamasyz etý maqsatynda jobanyń ǵylymı basshysyna kúntizbelik jylǵa bekitilgen jalpy kólem sheńberinde qarajatty shyǵyndar baptary arasynda qaıta bólý quqyǵy qarastyrylǵan", - dedi Talǵat Júnisov.
Zańmen "ǵylymı ádep" uǵymy engiziledi.
"Úshinshiden, Qazaqstan Respýblıkasy azamattarynyń merzimdi áskerı qyzmetti ótkerý kezeńinde ótkiziletin konkýrstyq irikteý negizinde, merzimdi áskerı qyzmetten shyǵarylǵan kúnnen bastap 1 jyl ishinde joǵary áskerı jáne arnaýly, joǵary jáne joǵary oqý ornynan keıingi oqý oryndaryna túsýge jeńildikter berý, sondaı-aq alǵashqy jyly jataqhanadan oryn alýǵa basym quqyq berý kózdeledi", - dep atap ótti spıker.