Kún ótken saıyn kóshe mádenıetin saqtamaıtyndar kóbeıip keledi.
Ásirese, qoǵamdyq oryndarda kóp baıqalýda. Osyǵan baılanysty arnaıy zań talaptary engizildi. Qoǵamda eskertilip jatyr. Biraq tyıylar emes. Tyıýdyń jalǵyz joly zań talabymen aıyppul salý. Sondyqtan Almaty polısıasy qoǵamdyq oryndarda túkirgender jazalanatynyn taǵy da eske saldy, – dep habarlaıdy Almaty-akshamy.kz.
Jalpy qoǵamdyq orynda túkirseńiz QR ÁQBtK-niń 434-2 babymen jazalanasyz.
– Usaq buzaqylyqpen ushtasqan sanıtarlyq normalardy buzý – osy quqyq buzýshylyqtardy jasaǵan jekelegen azamattardyń qoǵamdyq oryndarda tárbıesi men ózin-ózi ustaý mádenıetiniń tómendiginiń jemisi sanalady. Sonymen qatar qoǵamdy syılamaýshylyq pen qorshaǵan ortaǵa mensinbeýshilik tanytady. Buzýshylyqqa jol bergen adam ákimshilik jaýapkershilikke tartylady. Azamattardy tártipti saqtaýǵa, zańdy buzbaýǵa shaqyramyn. Qoǵam birlese otyryp, óz qalasynyń tabıǵı qundylyqtary men moraldyq-mádenı kelbetin saqtaı alady. Al Almaty Qazaqstannyń qarjy-ekonomıkalyq jáne mádenı ortalyǵy retinde tek azamattardyń kómegimen óz mártebesin, jaqsy ımıjin saqtap qalýy kerek, – dedi Almaty qalalyq PD jergilikti polısıa qyzmeti basqarmasynyń basshysy Erjan Uzabaev.
Sonymen qatar Almaty polısıasy sıfrlyq aqparattyq resýrstardy, onyń ishinde QR İİM júzege asyryp jatqan “102” qosymshasy arqyly azamattardyń habarlamalaryn omnıkanaldy qabyldaýdy paıdalana otyryp, polısıaǵa habarlasýdyń balamaly tásilderin eske saldy.
– Aıta ketý kerek, Almaty turǵyndary belsendilik tanytyp, zańdylyq pen tártipti qamtamasyz etýge óz úlesterin qosýda. Olar qol jetimdi baılanys arnalaryn paıdalana otyryp, usaq quqyq buzýshylyqtar týraly habarlaıdy. Jyl basynan beri “102” qosymshasy arqyly azamattar 10 myńǵa jýyq habarlama joldaǵan. Eń jıi kezdesetini – adamdardyń qoǵamdyq oryndarda túkirýi. Almatyda polıseıler 11-15 qyrkúıek aralyǵynda qoǵamdyq oryndardy lastaýdyń 257 deregin anyqtasa, onyń 71-i – kóshege túkirgender. Aıyppul somasy 433 myń teńgeni qurady, – dedi Uzabaev.