Aqsýda mas turǵyn polısıa qyzmetkeriniń zańdy talabyna baǵynbaı, basynan útikpen uryp, bilegin tistep alǵan, – dep habarlaıdy Polisia.kz.
Aqsý qalasynda saǵat 21:00-de qala turǵyny polısıaǵa habarlasyp, Qamzın kóshesindegi páterdegi otbasylyq janjal týraly habarlap, kómek suraǵany belgili boldy. Atalǵan mekenjaıǵa ýchaskelik polısıa ınspektory jiberildi. Polısıa qyzmetkeri kelgen soń, qala turǵyny mas kúıinde janjal shyǵaryp, ózin agressıvti ustaǵan ulyna shaǵymdanǵan.
– Er adam polısıa qyzmetkeriniń zańdy talaptaryn elemeı, agressıvti áreket etip, polısıa qyzmetkerine qarsylyq kórsetti. Ol útikpen ýchaskelik polısıa qyzmetkeriniń basynan soǵyp, bileginen tistep aldy. Kómek kórsetý úshin kórsetilgen mekenjaıǵa avtopatrýl jiberildi. Medısınalyq kýálandyrý nátıjeleri boıynsha er adam alkogóldik mas kúıinde boldy, osy jaǵdaıdy anyqtaý úshin quqyq buzýshy polısıa bólimine jetkizildi, – dep habarlady Pavlodar oblysy PD.
Osy fakti boıynsha Qazaqstan Respýblıkasy QK-niń 380-baby 3-bóligi (Bılik ókiline qatysty qorqytý nemese kúsh kórsetý áreketteri) boıynsha sotqa deıingi tergeý bastaldy. Qazaqstan Respýblıkasy Konstıtýsıasynyń 77-baby 3-tarmaǵynyń 1-tarmaqshasyna, Qazaqstan Respýblıkasy Qylmystyq is júrgizý kodeksiniń 19-baby 1-bóligine sáıkes onyń kinási sottyń zańdy kúshine engen úkimimen tanylǵanǵa deıin adam qylmys jasaǵany úshin kináli emes dep esepteledi.