Almatyda 26 jastaǵy jigit jataqhanadaǵy kórshisiniń kóligin urlap ketti
26 jastaǵy S.esimdi azamat ózimen birge turatyn kórshisiniń tıesili Toyota kóligin zańsyz ıemdenip alǵan, dep habarlaıdy Almaty-akshamy.kz Polisia.kz-ke silteme jasap.
«Kúdikti zańsyz baıý maqsatynda Toyota Camry avtokóligin jasyryn aıdap ketken. Er adam jábirlenýshimen bir jataqhanada turǵan. Aıyptalýshy urlyq josparyn kópten beri oılap júrgen: kórshisi uıyqtap qalǵanda kiltti alyp, dabyldy óshirip, ketip qalǵan. Ol kólikti Almaty oblysyndaǵy týystarynyń úıinde jasyrǵan, ony bizdiń bólimsheniń krımınaldyq polısıa bóliminiń qyzmetkerleri sol jerde taýyp aldy, – dedi Áýezov aýdandyq polısıa basqarmasynyń bastyǵy Ulan Ábilhaıyr.
Urlyq týraly aryzdan keıin polısıa qyzmetkerleri kóliktiń júrý baǵytyn qadaǵalap úlgerdi. Qylmys jasaǵany úshin ustalǵan S.esimdi azamat óz áreketin joqqa shyǵarmady: ol óz kinásin birden moıyndap, aqshanyń qatty kerek bolǵanyn aıtty.
«Kúdiktiniń aıtýynsha, ońaı aqsha tabý oıy kútpegen jerden paıda bolǵan jáne ol azǵyrýǵa tótep bere almaǵan. Buǵan deıin er adamnyń zańmen eshqandaı qıyndyǵy bolmaǵan. Tergeý kezeńinde kúdikti QR Qylmystyq is júrgizý kodeksiniń 128-babyna sáıkes ýaqytsha ustaý ızolátoryna qamaldy. Qylmystyq is QR QK-niń 188-baby 3-bóliginiń 1-tarmaǵyna sáıkes tergelýde», – dedi U. Ábilhaıyr.