Qasym-Jomart Toqaev jastardy el Táýelsizdiginiń 30 jyldyq mereıtoıymen quttyqtap, búgingi kezdesýdiń erekshe mán-mańyzy bar ekenin aıtty
Prezıdent Táýelsizdik urpaqtaryn, shyn máninde, jańa Qazaqstannyń basty sımvoldarynyń biri retinde atap ótti, dep habarlaıdy Almaty-akshamy.kz Akorda.kz-ke silteme jasap
– Elimiz derbes memleket bolǵannan beri oıy erkin, rýhy azat tutas býyn ósip jetildi. Táýelsizdik perzentteriniń aldyńǵy tolqyny erjetip, el isine aralasýda. Olar otanymyzdyń ósip-órkendeýine óz úlesin qosyp kele jatyr. Men egemendik kezeńinde týyp-ósken jastarymyzǵa arnaıy grant bólýdi tapsyrǵanmyn. Bul – talapty ul-qyzdarymyzdyń bastamalaryn qoldaý úshin jasalǵan qadam. Qazaqta «Jas kelse – iske» degen jaqsy sóz bar. Halqymyz jastarǵa árdaıym zor senim artyp, erekshe úmit kútedi. Urpaqtyń tárbıeli, bilimdi jáne bilikti bolýyna aıryqsha den qoıady, – dedi Memleket basshysy.
Qasym-Jomart Toqaev daryndy jastarymyz elimizdiń bolashaǵyna degen senimdi nyǵaıta túsetinin, olardyń týǵan el úshin qyzmet etýge qulshynysy qýantatynyn aıtty.
– Men grant jeńimpazdary usynǵan jobalarmen tanysyp shyqtym. Bul jobalardyń kópshiliginde ekologıaǵa basa mán berilgenin baıqadym. Bul – óte durys. Óıtkeni, qorshaǵan ortany qorǵaý – qazir barsha adamzat úshin asa mańyzdy másele. Keń baıtaq jerimizdiń biregeı tabıǵatyn saqtaý – bárimizdiń qasıetti boryshymyz. Jastardyń tyń ıdeıalary naqty júzege asyp, halyqtyń ıgiligine aınalady dep senemin. Shyn máninde, bul elimizdiń mereıtoıyna Táýelsizdik urpaqtarynyń tartýy bolmaq, – dedi Memleket basshysy.
Qasym-Jomart Toqaev qazirgi ýaqytta tabysty adam bilimdi, eńbekqor bolý, maqsatqa umtylý jáne belsendilik tanytý sıaqty qasıetterimen ǵana erekshelenetinin atap ótti. Qasym-Jomart Toqaev grant jeńimpazdaryna jobalaryn iske asyrýǵa jaqsy múmkindik berilip otyrǵanyn aıtty.
– Qazaqta «Talaptyǵa jol ber» degen naqyl sóz bar. Memleket jastardyń talabyn ushtaýǵa barynsha jaǵdaı jasap kele jatyr. Atqarylyp jatqan aýqymdy jumystyń, reformalardyń ıgiligin sizder mindetti túrde kóresizder. Jaqynda Elbasy jastarǵa tereń maǵynaly úndeýin joldady. Óskeleń urpaq aǵa býynnyń úmitin aqtaıtyny sózsiz. Sol úshin árbir jas boıyna tek jaqsy qasıetterdi sińirýi kerek, – dedi Prezıdent.
Jıyn sońynda Memleket basshysy jasampaz, otanshyl ári ultjandy jastar ǵana elimizdi órkendete alatynyn aıtyp, jastardyń bolashaqta kásibı maman, óz isiniń naǵyz maıtalmany bolatynyna, sol arqyly aǵa býynnan asyp túsetinine senim bildirdi.
Jastar óz kezeginde memlekettiń qoldaýy úshin Prezıdentke alǵys aıtty.