Almaty qalalyq perınataldyq ortalyǵynyń gınekology Ásel Omarqulova onlaın brıfıńte vaksınanyń birinshi komponentin alǵan jáne júktilik týraly keıin bilgen áıelderdi esh alańdamaýǵa shaqyrdy, dep habarlaıdy almaty-akshamy.kz
«Eger áıel vaksınanyń birinshi dozasyn alyp, júkti ekenin bilse, munda qorqatyn eshteńe joq. Ol ekinshi dozany alý úshin medısınalyq kómekke júginedi. Júkti áıelderdi vaksınalaý máselesi búginde álemde talqylanyp, qarastyrylyp jatyr. Júktiliktiń alǵashqy úsh aıynda egjeı-tegjeıli skrınıngtik zertteýden, ÝDZ-di 11-13 apta aralyǵynda ótý kerek», - dedi Ásel Omarqulova.
Ol medısınada ana men uryqtyń ómirin saqtap qalý úshin júktilik kezinde vaksına alýdyń kóptegen mysaly bar ekenin tilge tıek etti. Sebebi júkti áıelderde de koronavırýs ınfeksıasyn juqtyrý qaýpi bar.
«Dúnıejúzilik densaýlyq saqtaý uıymy júkti áıelderge koronavırýsqa qarsy vaksına alýdy usynady. Vaksına uryqqa ene almaıdy jáne oǵan vırýs juqpaıdy, ana súti de vırýstan taza bolady», - dedi dáriger.
Onyń aıtýynsha, jaqyn arada júktilikti josparlap otyrǵan áıelderge KVI-ge qarsy vaksına alý qajet. Sonymen qatar, júktilikti vaksınanyń ekinshi komponentin alǵannan keıin bir aıdan keıin josparlaǵan jón.
«Vaksınalaý júktilikke nemese reprodýktıvti júıege eshqandaı áser etpeıdi. Bizdiń elde júkti jáne bala emizetin áıelderge ekpe salý týraly áli aıtylǵan joq. Dárigerler preparatty ázirleýshiler júrgizgen klınıkalyq zertteýlerdiń resmı nátıjelerin kútýde. Usynymdar túsken boıda eshkim vaksınany dereý qoldanbaıdy. Bári qaýipsiz jaǵdaıda ári óz retimen jasalatyn bolady», - dedi Ásel Omarqulova.