Ustap kóretin fotosýretter: Zaǵıp jáne nashar kóretinderge arnalǵan Almatydaǵy erekshe kórme
Canon kompanıasy Qazaqstanda kórý qabileti buzylǵan adamdar men kórermenniń arasyndaǵy shekarany joıýǵa arnalǵan «Kórinbeıtin álem» kórmesiniń ótetindigin maqtanyshpen jarıalaıdy. Almatyda alǵash ret ótetin bul ınklúzıvtilik jolyndaǵy mańyzdy oqıǵa zamanaýı óner men tehnologıalar álemdi qabyldaýdaǵy aıyrmashylyqtarǵa qaramastan adamdardy qalaı biriktire alatynyn túsiný jolyndaǵy mańyzdy qadam bolmaq.
Dúnıejúzilik densaýlyq saqtaý uıymynyń málimetteri boıynsha, dúnıe júzinde 2,2 mıllıardtan astam adam kórý qabiletiniń buzylýynyń ártúrli túrlerimen betpe-bet keledi jáne olardyń kópshiligi úshin fotosýret qupıa bolyp qala bermek. Qazaqstanda 160 myńǵa jýyq adam osyndaı shekteýlermen ómir súredi. "Kórinbeıtin álem" kórmesi kedergilerdi joıýǵa tyrysyp, ónerdi kórý qabiletine qaramastan barlyǵyna qoljetimdi etedi.
Kórmede releftik sýrettermen, dybystyq sıpattamalarmen, sondaı-aq Braıl shrıftimen oryndalǵan mátinderi bar tanymal fotograftardyń jumystary usynylady. Bul taktıldi jáne aýdıovızýaldy elementter nashar kóretin jáne zaǵıp adamdarǵa sheberler aıtqan beıneler men áńgimeler álemine enip, janasý men dybys arqyly fotosýretterdi sezinýge erekshe múmkindik beredi.
Kórý qabileti jaqsy kórermen úshin kórme joǵary sapaly fotografıalyq ónermen kezdesý ǵana emes, sonymen qatar kórý qabileti buzylǵan adamdardyń kózimen álemdi seziný múmkindigi bolady. Arnaıy kózildirik-sımýlátorlardyń kómegimen glaýkomadan dıabettik retınopatıaǵa deıingi ártúrli vızýaldy patologıalardaǵy keskinderdi qabyldaýdyń qalaı ózgeretinin kórýge bolady.
"Canon - da biz álemdi ózgerte alatyn sýretterdiń kúshine senemiz jáne "kórinbeıtin álem" kórmesi ınovasıanyń ónerdi barlyǵyna qoljetimdi ete alatynynyń jarqyn mysaly bolyp tabylady. Zamanaýı basyp shyǵarý tehnologıalary kórý qabileti shekteýli adamdar úshin qabyldaýdyń jańa kókjıegin ashatyn janasyp "kórýge" bolatyn keskinderdi jasaýǵa múmkindik beredi", — dep atap ótti Canon kompanıasynyń ókili.
Bul kórme tek mádenı oqıǵa ǵana emes, sonymen qatar árkim ónerge qol jetkizýge quqyly neǵurlym ınklúzıvti qoǵamǵa jasalǵan mańyzdy qadam. "Kórinbeıtin álem" óner qandaı bolýy kerek jáne mádenı is-sharalardyń bolashaǵy qandaı bolýy múmkin degen uǵymdy ózgertedi.
Ótetin kúni: 2024 jylǵy 25 qyrkúıek-24 qazan aralyǵy
Ýaqyty: 10:00 - 19:00, dúısenbi - jabyq
Ótetin orny: Á. Qasteev at.QR MMI Ortalyq kórme zaly
Kirý tegin