Taksıge 3 jolaýshy otyra alady
Seýl turǵyndary úshin ózdiginen júretin taksı qyzmeti iske qosyldy. Ázirge avtonomdy kólik qyzmetin barlyǵy birdeı paıdalana almaıdy. Biraq kúzge deıin Koreıanyń kez kelgen turǵyny mundaı kólikke tapsyrys bere alady, dep habarlaıdy Almaty-akshamy.kz «Habar 24» telearnasyna silteme jasap.
Júrgizýshisiz taksıdiń alǵashqy jolaýshysy kólik mınıstri men Seýl basshysy boldy. VIP-terdiń qaýipsizdigi úshin júrgizýshini otyrǵyzdy. Biraq ol is júzinde túımelerdi baspady.
Avtonomdy taksıde júrgizýshiniń kózi men qulaǵy - kamera. Kóliktiń ishinde berilis qoraby joq. Al dıspleıde taksıdiń aldy men artyndaǵy qozǵalys týraly barlyq qajetti aqparat bar.
Jańa tehnologıalar áıgili Psaı ánimen tanymal Kannam aımaǵynda kórsetildi. Bul kósheler Koreıadaǵy keptelis eń kóp kezdesetin dańǵyldyń biri. Biraq, jasandy ıntelekt tájirıbeli júrgizýshiden kem emes. Óıtkeni, oǵan 26 jolǵa ornatylǵan qurylǵylar kómektesedi. Sondyqtan júrgizýshisiz mashına jaıaý júrginshilerdi jáne baǵdarsham tústerin sezedi, bir jolaqtan ekinshi jolaqqa aýysa alady. Taksı keptelis týraly aqparat alyp, baǵyt boıynsha eń tez jolmen barady.
«Ózin ózi basqaratyn mashınalarmen aınalysatyn kompanıalar 2024 jylǵa deıin 4-deńgeıdegi ózin-ózi basqaratyn kólikterdi satýǵa qajetti standarttarǵa saı bolady. Biz spýtnıktik baılanys, 3D kartalary sıaqty ınfraqurylymdy belsendi túrde keńeıtýdi josparlap otyrmyz. Sonymen qatar, avtonomdy kóliktermen apat bolǵan jaǵdaıda qoldanylatyn saqtandyrý jaýapkershiligi standarttaryn daıyndaımyz»,-deıdi Koreıa jer, ınfraqurylym jáne kólik mınıstri Von Hı Ren.
Júrgizýshiler men jaıaý júrginshilerge qolaısyzdyq týdyrmas úshin taksı jumys kúnderi saǵat 10-nan 16-ǵa deıin jumys isteıdi. Óıtkeni, bul ýaqytta keptelis az. Taksıge 3 jolaýshy otyra alady. Júrgizýshisiz kólikke qosymsha arqyly tapsyrys berýge bolady. Tólemaqy onlaın rejıminde tólenedi. ázirge bul qyzmet tegin.
«Ázirge 2 taksı ǵana júredi. Úkimet 2025 jylǵa qaraı avtobýstarmen qamtamasyz etýge tyrysady. Al 2030 jylǵa qaraı Koreıanyń kez kelgen jerinde júrgizýshisiz taksıge tapsyrys berýge bolady dep josparlap otyrmyz»,-deıdi Koreıa jer, ınfraqurylym jáne kólik mınıstrliginiń bólim bastyǵynyń orynbasary Lı Háng.
Kelesi jyly avtonomdy taksı aımaǵy eki esege artady. Júrgizýshisi joq kólikter uzyndyǵy 49 shaqyrymǵa jýyq joldarda júredi. Aldaǵy 3 jylda ıntellektýaldy kólik júıesin damytýǵa Koreıada shamamen 876 mıllıon dollar jumsaıdy.