1 qyrkúıek Prezıdent Qasym-Jomart Toqaevtyń Joldaýyn jalpy jurt asyǵa kútýde. Jalpy Joldaýda ne másele kóteriledi? Ne kútemiz? Osy jaıynda fılosofıa, saıasattaný jáne dintaný ınstıtýtynyń ǵylymı qyzmetkeri, saıasattaný PhD doktoranty Baqytjan Shynar Erjanqyzynan Almaty-akshamy.kz tilshisi surap kórgen bolatyn.
2023 jylǵy 28 tamyzda Májilis Tóraǵasy Erlan Qoshanov «Qazaqstan Respýblıkasy Konstıtýsıasynyń 58-baby 4-tarmaǵynyń 2 tarmaqshasyna sáıkes Qazaqstan Respýblıkasy Parlamenti Palatalarynyń birlesken otyrysy 2023 jylǵy 1 qyrkúıekte saǵat 11.00-de Astana qalasynda shaqyrylsyn», dep jazylǵan Ókimge qol qoıdy. Birneshe jyldan beri barsha qazaqstandyqtar 1 qyrkúıek – el Prezıdentiniń Qazaqstan halqyna Joldaýyn tolqýmen kútýde. Óz joldaýynda Prezıdent ótken jyldyń qorytyndylaryn taldap, taıaý jylǵa memleket damý baǵytyn aıqyndaıtyn baıandama jasaıdy.
Ótken joldaýdyń qorytyndylaryn aıtar bolsaq, Memleket Basshysynyń áleýmettik jáne ekonomıkalyq salalardaǵy tapsyrmalaryn oryndaý qıynǵa soqqan sıaqty. Onyń ústine sońǵy jyly elde bolǵan birqatar qaıǵyly oqıǵalar - Ekibastuz ben Rıdderdegi apattar, orman órtteri, Almatydaǵy kópqabatty úıde jáne Qaraǵandy oblysyndaǵy "Qazaqstan" shahtasyndaǵy avarıa jaǵdaıdy tipti ýshyqtyryp jiberdi. Osyǵan baılanysty keler joldaýda Prezıdent sheneýnikterdiń jaýapkershiligi týraly máseleni qaıta kóterýi múmkin. Shynynda da, jeke komersıalyq qurylymdar jáne olarmen ózara árekettesetin belgili bir memlekettik organdardyń bul qaıǵyly oqıǵalarǵa tikeleı qatysty jaýapkershilik úlesi bar. Sonymen qatar, olardyń kópshiliginde kúrdeli jaǵdaılarda tıimdi áreket etý úshin qajetti bilim men tájirıbe jetispeıtini anyq. Sondyqtan aldaǵy joldaýdan memlekettik basqarý júıesinde barlyq deńgeıdegi memlekettik qyzmetshilerdiń ishki jáne vedomstvoaralyq baqylaýy men tártiptik jaýapkershiligin kúsheıtý jóninde sharalar qoldanýyn kútemiz.
Ekonomıkaǵa qatysty bóliminde Prezıdent shetelge zańsyz shyǵarylǵan kapıtaldy elge qaıtarý boıynsha máseleni taǵy kóterýi múmkin. Osyǵan baılanysty Joldaý barysynda QR Bas prokýratýrasynyń janynan aktıvterdi qaıtarý jónindegi arnaıy keńes qurylyp, bul sharanyń jumysyn ońaltý úshin normatıvtik-quqyqtyq bazasy tolyqtyrylady dep kútemiz.
Saıası sharalarǵa keletin bolsaq, naýryz aıynda jarıalanǵan 45 aýdan men oblystyq mańyzy bar qalalardyń ákimderin tikeleı saılaýyn ótkizý taqyrybyna qaıta oralyp, keıinnen tıisti jarlyq qabyldanýy múmkin. Saıası sarapshylardyń pikirinshe bul saılaýdyń ózi osy jyldyń sońyna deıin ótedi dep boljanady. Osy oqıǵa aıasynda jergilikti ózin-ózi basqarý júıesin odan ári reformalaý máseleleri ózekti bolyp qala bermek.
Memlekettiń syrtqy saıasaty boıynsha asa qatty ózgeristerdi kúte almaımyz, sebebi Qazaqstan óziniń dostyq pen teńdikti negizge alǵan kópvektorly saıasatyn ári qaraı jalǵastyrýǵa májbúr. Tek kópvektorly syrtqy saıasat Qazaqstannyń búgingi kúngi múddesin aqtaı alady, biraq sondada álemde bolyp jatqan qaqtyǵystarǵa qatysty sheteldik sanksıalar týraly birqatar eskertýlerdi eskere otyryp, osy baǵytta zań kúsheıtiledi dep kútemiz, -deıdi Shynar Erjanqyzy.