Jańa úı salǵan qurylys kompanıasy ýaqytsha basqarýshy kompanıany eki jylǵa deıingi merzimge taǵaıyndaı alady, dep habarlaıdy aqshamnews.kz
Senat depýtattary turǵyn úılerdi basqarýǵa qatysty zańdy maquldady. Zańǵa sáıkes, kondomınıým obektisin basqarýdyń eki formasy ǵana qalady. Olar: múlik ıeleriniń birlestigi jáne tikeleı birlesken basqarý. Sosyn turǵyn úıdi basqarýdyń eki túri - basqarýshy kompanıa jáne páter ıeleriniń kooperatıvi saqtalady.
"Kóppáterli úılerdiń ortaq múlkin tıisti jaǵdaıda ustaý maqsatynda zańda basqarýshy kompanıanyń ýaqytsha basqarýdy júzege asyra alatyny kózdeledi. Ýaqytsha basqarý turǵyn úı ıeleri múlik ıeleriniń birlestigin qurmaǵan nemese basqarý sýbektisin tańdaý týraly sheshim qabyldamaǵan jaǵdaılarda qoldanylady", - deıdi depýtattar.
Al jańa úı salǵan qurylys kompanıasy ýaqytsha basqarýshy kompanıany eki jylǵa deıingi merzimge taǵaıyndaı alady.
Budan bólek, zańda múlik ıeleri birlestigi tóraǵasynyń ókilettik merzimi bir jyldan úsh jylǵa deıin uzartylady. Sondaı-aq, tóraǵaǵa múlikti basqarý jónindegi qyzmetti derbes júzege asyrý quqyǵy beriledi.
Turǵyndardyń jınalystaryn ótkizý tártibine de ózgeris engiziledi. Atap aıtqanda, jazbasha saýalnama júrgizý nemese memlekettik aqparattyq júıeler arqyly elektrondyq daýys berý arqyly syrttaı formattaǵy múmkindik bolady.
Jergilikti máslıhattar kóppáterli turǵyn úılerdiń paıdalaný shyǵystaryna jarnalardyń eń az mólsherin aılyq eseptik kórsetkishper esepteý júıesin engize alady. Al turǵyn úı ınspeksıasynyń quzyretin keńeıtiledi.
Aıta keteri, búgin senat zańdy birden eki oqylymda maquldap, prezıdenttiń qol qoıýyna jiberdi.