Elordada Ulttyq akademıalyq kitaphanada jazýshy-satırık, qoǵam qaıratkeri Kópen Ámirbektiń «Kópen kele jatyr!..» atty bes tomdyq shyǵarmalar jınaǵynyń tusaýkeseri ótti, dep habarlaıdy Almaty-akshamy.kz Aikyn.kz-ke silteme jasap.
Sharanyń ashylý rásimin jýrnalıs Sharhan Qazyǵul júrgize otyryp, Kópen Ámirbek jaıyndaǵy jyly estelikterimen bólisti.
«Kópen aǵany kózi tirisinde kórgenimde, ózim Arıstoteldiń bas súıegin kórgendeı bolamyn. Qolyna qalam alǵandar satırık bola almaıdy. Ol ońaı emes. Satırık bolý úshin jartylaı fılosof bolý, fılosof bolý úshin jartylaı satırık bolý kerek. Aqıqattyń barlyǵy fılosofıada. Sol fılosofıany, aqıqatty aıtý úshin satırık bolý mindetti. Osy turǵydan alǵanda Kópen Ámirbek qazirgi zamanǵy qazaq ádebıetinde alatyn orny erekshe qalamger dep aıtýǵa bolady, – dedi ol.
Satırık Kópen Ámirbek kózi tiri bolǵanda 73 jasqa tolar edi. Qazaqta «jaqsynyń aty ólmeıdi, ǵalymnyń haty ólmeıdi» degen támsil bar. Osy turǵyda jazýshy-satırık Kópen Ámirbektiń «Kópen kele jatyr!…» atty 5 tomdyq shyǵarmalar jınaǵyn ózi jınaqtap, kitaptyń tusaýkeserin jasamaq bolǵan. Kelinshegi Áıgerim Asanovanyń aıtýynsha, jınaqty qalyń oqyrmanǵa tanystyryp, jetkizýdi amanat dep bilgen.
– Bes tomdyq jınaq shyqty degenin estip, tańdanǵanym ras. Eń áýeli Kópekeń qaı ýaqytta jazyp úlgergen dep oıladym. Iýmor bar jerde adamnyń jasampyzdyǵy kórinedi. Osy turǵydan qaraǵanda, Kópen Ámirbektiń ótken ǵasyrdyń 70-80-90 jyldarynda qazaq mádenıetine atqarǵan róli eleýli. Halqymyzǵa ejelden tán qaljyńdy, ótkir sózdi, syn-syqaqty jańa bir bıikke kótergen. Ospanhannyń dańqty dástúrin jalǵastyrǵan juldyzdy izbasary. Kópendi anyq moıyndaýdaǵy dúnıe – onyń esimi, – dedi Saýytbek Abdrahmanov.
Kópen Ámirbek ár jyldary jaryq kórgen «Aty joq kitap», «Alyp», «Tilim qyshyp barady», «Qysyr áńgime», «Aýyzbastyryq», «Myń bir mysal», «Nemeneńe jetisip kúlesiń?», «Ózińdi tanısyń ba?», «Saıdaǵy qoıshydan saraıdaǵy patshaǵa deıin», «Kókemniń kózi», «İz», «Pa, shirkin, parodıa», «Juma sálem», «Jigitter jıyny» atty ázil-syqaq, parodıa kitaby arqyly oqyrmandarǵa keńinen tanylǵan bolatyn.
Al osy jolǵy jınaq 500 danamen shyqqan. Kitaptyń birinshi tomy satıraǵa arnalsa, ekinshisi – Kópen Ámirbektiń suhbattary jınaqtalyp, sońǵy bólimi fotoalbom retinde jaryq kórgen.
– Satıra salasynda Kópen Ámirbektiń orny da, aty da, eńbegi de erekshe. 2000 jyldary saılaýǵa Kópen aǵa da qatysqan. Joly bolmaı, ótpedi. Sol jaǵdaıdan keıin bir kúni kezdesip qaldyq. Ózińizdiń únińizdi tanytyp, satıra salasynda emin-erkin júre bermeısiz be dep jubatý sózderin aıtqan edim. Sodan keıin «Kópen kele jatyr!..» degen joba bastalyp ketti. Sol atpen, mine, halyqqa jattalyp qaldy. Aıqyn gazetinde «Ara» ataýymen arnaıy nomer jazylyp kele jatyr. Bul da Kópen aǵaǵa kórsetilgen qurmet dep bilemiz,- dedi senator, pýblısıs Nurtóre Júsip.
Sonymen qatar, tusaýkeser rásimine Berdibek Saparbaev, Jarylqap Beısenbaı, Darhan Myńbaı, Nurtóre Júsip, Baýyrjan Omarov, Dıhan Qamzabekuly jáne basqa da belgili qoǵam qaıratkerleri qatysty.
Ómiriniń sońǵy jyldarynda Kópen Ámirbek Aiqyn respýblıkalyq qoǵamdyq-saıası gazetiniń «Ara» qosymshasynda redaktorlyq qyzmet atqarǵan. Gazettiń atalmysh qosymshasy áli kúnge deıin turaqty túrde shyǵyp tur. Negizi Kópen Ámirbek buǵan deıin «Qazaq ádebıeti», «Egemen Qazaqstan» gazetterinde satıra, feleton bóliminiń meńgerýshisi, «Bilim jáne eńbek», «Ara-SHmel» jýrnalynda jaýapty hatshy, QR Bas prokýratýrasy men Joǵarǵy Sotta baspasóz hatshysy bolyp uzaq jyldar qyzmet istegen.
Sondaı-aq «Ara» jýrnalynyń bas redaktory, Qazaq radıosy dırektorynyń orynbasary, Qazaqstan Jazýshylar odaǵy basqarmasy satıra keńesiniń tóraǵasy qyzmetterin atqarǵan.