Kópbalaly otbasylar buǵan deıin de memleket tarapynan qoldaýǵa ıe bolǵan.
Bıyldan bastap Qazaqstanda kópbalaly otbasylar úshin salyqtyq jeńildikter qarastyryp, jylyna 282 aılyq eseptik kórsetkishke (AEK) deıin, ıaǵnı 1 108 824 teńge kóleminde salyq shegerimi engiziledi, dep habarlaıdy aqshamnews.kz
Mysaly, 2024 jyly 577 myńnan astam otbasyǵa járdemaqy tólendi, onyń jalpy somasy 432 mıllıard teńgege jetti. Endi bul qoldaý 2025 jyly jańa salyq jeńildikterimen tolyqtyrylady. Degenmen qoldaý tek jeńildiktermen shektelmeıdi.
2025 jyldyń qańtarynan bastap, Uchet.kz portaly aqparatynsha, kópbalaly otbasylarǵa salyq shegerimin engizetin Qazaqstan Respýblıkasy Salyq kodeksiniń buryn toqtatylǵan bólimi qaıta kúshine enedi. Ol ata-ananyń ekeýine de qoldanylady, biraq 282 aılyq eseptik kórsetkishten aspaıtyn mólsherde (2025 jyly 1 108 824 teńge): kópbalaly otbasynyń ata-anasynyń birine ár aıǵa 23 AEK (90 436 teńge); kópbalaly otbasynyń árbir ata-anasyna aıyna 12 AEK (47 184 teńge). Bul jeńildikter tórt jáne odan da kóp kámeletke tolmaǵan balasy bar otbasylarǵa beriledi. Osylaısha, 2025 jyly kópbalaly otbasy aı saıyn 90 myń teńgege jýyq tabysyn salyqtan bosata alady.
Salyq kodeksiniń 342-babyna sáıkes, kópbalaly otbasylar salyq shegerimderin basqa jeńildiktermen biriktire alady. Olardyń ishinde: Mindetti zeınetaqy jarnalary; Mindetti áleýmettik medısınalyq saqtandyrýǵa aýdarymdar; Standartty salyq shegerimderi. Osy shegerimderdiń jıyntyq mólsheri jylyna 564 AEK-ke (2 217 648 teńge) deıin jetýi múmkin.
Sarapshylardyń pikirinshe, barlyq qajetti qujattar usynylǵan jaǵdaıda, kópbalaly otbasylar salyq túrindegi shyǵyndy aıtarlyqtaı únemdeı alady. Sondaı-aq 2025 jyldan bastap dári-dármekterge jumsalatyn shyǵyndar úshin salyq shegerimine 18 jasqa deıingi asyraýyndaǵy balalardyń shyǵyndary da qosymsha engiziledi.