Tolyq aqparatty 1414 nómiri boıynsha bilýge bolady
16 myńǵa jýyq qazaqstandyq kópbalaly otbasylar úshin taǵaıyndalatyn járdemaqyny proaktıvti formatta aldy, dep habarlaıdy Almaty-akshamy.kz QazAqparatqa silteme jasap.
Ótken jyldyń mamyr aıynan bastap áıelderge tórtinshi nemese odan da keıingi balany týǵan kezde taǵaıyndalatyn kóp balaly otbasylar járdemaqysyn alý úshin HQKO-ǵa júginý mindetti emes, memlekettiń ózi barlyǵyn qashyqtan SMS arqyly rásimdeýdi usynady.
Budan buryn atalǵan járdemaqyny resimdeý úshin HQKO-ǵa baryp, ótinish jazyp, jeke kýálik, balalardyń týý týraly kýálikteri men neke qıý kýáligi sıaqty qujattardy usyný qajet edi, al járdemaqy ótinish berilgen kúnnen bastap taǵaıyndalatyn.
«Otbasynda tórtinshi nemese odan keıin taǵy bala týylǵan jaǵdaıda, proaktıvti túrde balanyń týý týraly kýáligin, bala týý men onyń bir jasqa deıingi kútimine baılanysty beriletin járdemaqylardy ǵana emes, kópbalaly otbasylar úshin járdemaqyny resimdeýdi usynatyn SMS-habarlama da jiberiledi. Munda klıenttiń SMS-ke kelisimi ǵana kerek. Qajetti málimetter memlekettik organdardyń aqparattyq júıelerinen alynady. HQKO-ǵa barýdyń qajeti joq», – deıdi «Azamattarǵa arnalǵan úkimet» memlekettik korporasıasynyń basqarma tóraǵasy Ádil Qojyqov.
Kópbalaly otbasylar úshin járdemaqy 2020 jyldyń basynan bastap tólenedi. Tólemdi tórt jáne odan da kóp bala týǵan áıelder ala alady.
Qazirgi ýaqytta bul járdemaqyny 487 myńnan astam qazaqstandyq otbasy alady. Onyń ishinde 63 437 áıel «Altyn alqa», 138 571 áıel «Kúmis alqa» ıegerleri.
2022 jyly kóp balaly otbasylarǵa taǵaıyndalatyn járdemaqy mólsheri:
4 balaǵa 49 100 teńge;
5 balaǵa 61 383 teńge;
6 balaǵa 73 666 teńge;
7 balaǵa 85 948 teńge;
8 balaǵa 98230 teńge;
Kelesi ár balaǵa +4 AEK.
Aıta keteıik, Qazaqstanda 4 jáne odan da kóp kámeletke tolmaǵan balasy nemese 23 jasqa tolǵanǵa deıin kúndizgi bólimde oqıtyn birge turatyn balalary barlar kópbalaly otbasy bolyp sanalady.
6 bala týǵan jáne tárbıelegen kópbalaly analarǵa «Kúmis alqa», al 7 jáne odan da kóp bala týyp, tárbıelegenderge «Altyn alqa» beriledi.
1414 nómirinen qyzmetterdi proaktıvti túrde rásimdeýdi usynatyn sms-habarlamalardy alý úshin telefon nómiri mobıldi azamattar bazasynda tirkelýi tıis.
Eger áıel qandaı da bir sebeptermen SMS arqyly qyzmet ala almasa, ol burynǵydaı HQKO-ǵa júgine alady.