Atalmysh baǵdarlamany Almatynyń mádenıet basqarmasy uıymdastyryp otyr
Shýaqty kóktemniń shyraıly merekesi – Halyqaralyq áıelder kúnine oraı Respýblıka saraıynyń tórinde merekelik konsert ótti, dep habarlaıdy Almaty-akshamy.kz Almaty.tv-ge silteme jasap.
Qalanyń qurmetti turǵyndary men eńbek ardagerleri, túrli salanyń betke ustar qyz-kelinshekteri qonaq bolǵan keshte ásem án shyrqalyp, kópshilikke kóńil kúı syılady.
«Neshe jyldan beri bir-birimizdi kóre almaı zaryǵyp kettik. Aman-esen osylaı elimmen júzdeskenime sondaı qýanyshtymyn. Qudaıǵa, halqyma rızashylyǵymdy bildiremin. Bul merekeniń orny bólek. Óıtkeni ana degen sóz ana qandaı qymbat bolsa búgingi mereke sondaı qymbat», - dedi Qazaqstannyń eńbek sińirgen qaıratkeri Asyly Osman
Konserttik baǵdarlamanyń shymyldyǵy áıelder qaýymyna arnaıy daıyndalǵan mýzykalyq nómirmen bastaldy. Zarına Altynbaeva, Nurbolat Abdýllın, Alısher Karımov pen «Jigitter» kvarteti jáne basqa da elge tanymal ánshiler óner kórsetken keshtiń kópshilikke erekshe áser qaldyrǵany da aıqyn.
«Mereke qutty bolsyn. Táýelsizdigimiz kún sóngenshe sónbesin. Osy halqyma sińgen eńbegimdi el basshylary baǵalady, 25 medalim bar. Rahmet! Mereke merekege ulassyn», - dedi qoǵam qaıratkeri Dárıa Sarqytbaeva.
Alda 8 naýryz – Halyqaralyq áıelder kúni jaqyndap keledi. Al qala turǵyndary men qonaqtary bul aıryqsha merekeni toılaýdy bastap ketti. Buǵan búgingi ásem, ádemi kesh dálel. Aıta ketý kerek, konsert Roza Rymbaevanyń oryndaýyndaǵy «Kóktem shaqyrady» ánimen aıaqtaldy.