Mınıstr jeke turǵyn úılerdiń ıelerin jylytý jáne elektrmen jabdyqtaý júıesin aldyn ala retke keltirýge, tútin murjalaryn tazartýǵa shaqyrdy
Syrym Sháriphanov Pavlodar oblysynyń turǵyndarymen kezdesýde osy mańyzdy máselege nazar aýdardy, dep habarlaıdy almaty-akshamy.kz
Jylytý kezeńiniń qorytyndysy boıynsha órtte qaza bolǵandar sany 6%-ǵa azaıdy, bul rette barlyǵy 3,5 myńnan astam órt tirkeldi.
Mınıstr órttiń shyǵýynyń negizgi sebepteri – elektr aspaptaryn montajdaý jáne paıdalaný erejelerin buzý - 34,3%, peshti jylytýdy durys ornatpaý jáne paıdalaný - 29,3%, otty abaısyz paıdalaný - 18% ekenin eske saldy.
«Osy faktilerdi eskere otyryp, aldaǵy jylytý kezeńine daıyndyq aıasynda azamattardan jylytý jáne elektrmen jabdyqtaý júıesin aldyn ala retke keltirýdi, tútin murjalaryn tazalaýdy júrgizýdi suraımyn», - dedi Syrym Sháriphanov.
Sonymen qatar, qysta gaz balondarynyń jarylyp, órt shyqqan faktiler sany óskeni tirkeldi.
Osyǵan baılanysty, Syrym Sháriphanov lısenzıalanǵan stansıalarda tek jaramdy jáne qajetti gaz jabdyǵyn paıdalaný kerektigin eske saldy. Eki qabattan asatyn kóp páterli úılerde gaz balondaryn qoldanýǵa tyıym salynady.