12 mamyr – Analar kúni. Qazaq qashanda anasyn ardaqtap, arýlaryn syılaı bilgen halyq. Bul – ejelden qanymyzǵa sińgen asyl qasıet.
«Jumaq – ananyń tabanynyń astynda» demekshi, Qudaıdan keıingi qudiret ıesi, ol – Ana. Adam – adam bolǵysy kelse, eń aldymen anasyn qasterleýi tıis. Osy rette Analar kúni merekesi qarsańynda biz «Kóp balaly analar úshin arnaıy turǵyn úı baǵdarlamasy kerek pe?» degen saýalnama júrgizgen edik.
Qýanysh AITAHANOV, qoǵam qaıratkeri:Árbir ana batyr ataǵyn alǵan kezde
páter tegin berilgeni jón– Árıne, kerek. Biraq arnaıy joba jasamaı-aq, turǵyn úı baǵdarlamasynyń ishinen kópbalaly analarǵa túrli jeńildikter qarastyrýǵa bolady. Qazirgi tańda bizdegi eń úlken másele, halqymyzdyń sany az, demografıalyq ósim máz bolmaı tur. Keń jerimiz bar, onyń asty-ústiniń bári baılyqqa toly. Tipti álemde jer aýmaǵy jóninen toǵyzynshy oryn alyp otyrmyz. Biraq halyq sany az. Al jan-jaǵymyzdaǵy alyp kórshi elder, tipti Ózbekstannyń ózinde jer az bolǵanymen, halqynyń sany basym. Kórshi elderdiń bizge kózin alartyp otyrǵanyn jasyra almaımyz. Olar ártúrli joldarmen bizdiń elge kelip, turaqtap qalýǵa tyrysyp jatyr. Sondyqtan biz qalaıda 2050 jylǵa deıin óz halqymyzdyń sanyn 30 mıllıonǵa jetkizýimiz kerek. Ol úshin memleket tarapynan barlyq jaǵdaılar jasalynǵany jón. Birinshiden, halyqtyń densaýlyǵyn jaqsartý, ana men balany qorǵaý, osy arqyly halyqtyń ómir súrý jasyn uzartý, týý kórsetkishin joǵarylatý úshin ásirese jas otbasylarǵa, kóp balaly analarǵa jaǵdaı jasaý, sheteldegi qandastarymyzdy elge alyp kelý degen sekildi túrli joldardy qarastyrýymyz qajet. Osynyń ishinde kópbalaly analardy baspanamen qamtý eń birinshi kezekte turýy tıis. Tórt baladan kóp týǵandardy batyr ana dep eseptep, olarǵa barynsha jaǵdaı jasaýymyz kerek. Bizde árbir ana tórt baladan kóp tapsam eken dep armandap, soǵan umtylatyndaı dárejege jetkizýimiz kerek. Ol úshin ıpokekalyq kredıt bolsyn nemese jalǵa beriletin turǵyn úıler bolsyn, onyń paıyzdary úshinshi baladan keıin qysqartylyp, tipti ana batyr ataǵyn alǵan kezde páter tegin berilgeni jón.
Káribaı TASSHABAEV, zańger:
Qaıtsek te kóbeıýimiz kerek
– Mindetti túrde kerek. 2050 jyly damyǵan 30 eldiń qataryna qosylamyz desek, eń birinshi kópbalaly analarǵa jaǵdaı jasaýymyz tıis. Áıtpese, ana buryshta, myna buryshta páter jaldap júrgen qyz-kelinshekter eshqashan kópbalaly bolǵysy kelmeıdi. Sebebi, áleýmettik jaǵdaı durystalmaı, halyqtyń sanyn ósiremiz deý bekershilik. Men ózim baspana máselesimen biraz jyldardan beri aınalysyp kelemin. Búginde jaldamaly páter ıeleriniń ózi kópbalaly analardy úıine kirgizgisi kelmeıdi. Balalary úıimdi búldiredi, shýlaıdy dep jolatpaıdy. Tipti keıbir sheneýnikter úı surap kelgen kóp balaly anaǵa «úı-jaıyń joq bolsa, nege bala kóp týasyń» dep urysqanyn da estidik. Budan keıin qyz-kelinshekterimiz qalaı kópbalaly ana bolǵysy keledi? Menińshe, mundaı sheneýnikter memlekettik basqarýǵa laıyqty emes dep esepteımin. Sondyqtan kóp bala týyp ósirgen áıelder úshin arnaıy turǵyn úı baǵdarlamasy óte qajet dep esepteımin.