Memleket basshysynyń tapsyrmasymen elimizde alǵash ret analarǵa alǵys aıtý kúni toılanady. Atalǵan mereke bıyl 12 mamyrǵa tústi.
Osyǵan oraı Pavlodar oblysynda Jastar bastamalaryn damytý ortalyǵynda «Anaǵa taǵzym» forýmy uıymdastyryldy. Oǵan óńirdiń túkpir-túkpirinen analar keńesiniń músheleri, eriktiler qatysty, dep habarlaıdy Almaty-akshamy.kz.
AIZADA QURMANOVA, PAVLODAR OBLYSY ÁKİMİNİŃ ORYNBASARY
Analar kúnin merekeleý analardyń mártebesin nyǵaıtýǵa, mańyzdylǵyn arttyrýǵa yqpal etedi. Ereksheligin jaqsy túsinemiz. Memleket basshysy anasyn ardaqtaǵan asyl qasıet dep atap ótken.
8 naýryz halyqaralyq áıelder kúni bir bólek meıram. Al, mamyrdyń ekinshi jeksenbisinde atap ótiletin analarǵa alǵys aıtý kúni endi basqa deńgeı men dárejege jetedi dep senemiz. Sebebi, barlyq jaqsylyq pen baqyttyń bastaýy anadan bastalady.
BAQYTJAMAL MAKSILOVA, «NUR-ANA ÁLEMİ» QB TÓRAǴASY
Qazaqstan halqy Assamleıasynyń analar keńesi qoǵamdyq birlik pen tatýlyqty nyǵaıtýǵa mektepke aınalyp, jumys atqarýda. Analar keńesi medıasıa salasynda ózin kórsete bildi.
Osy rette, El anasy Baqytjamal Shahanqyzy aldymen sý tasqyny kezinde birlese jumys jasaǵan eriktilerge erekshe alǵysyn bildirdi. Jastarǵa senim artyp, arnaıy marapatyn da usyndy. Al Zara Qabdeshqyzynyń qurmetine beriletin «Dara jol» tós belgisin Ulttyq eriktiler jelisiniń tóraıymy Vera Kımǵa berdi.
VERA KIM, QR PARLAMENTİ MÁJİLİSİNİŃ DEPÝTATY
Rasymen biz óz áıelderimizben, analarymyzben maqtana alamyz. Sebebi olar túrli salada jetistikke jetip, qýantyp otyr. Búgin óte keremet shara. Uıymdastyrýshylarǵa alǵys aıtamyn. Qaı zamandarda bolsyn ana men áıeldiń róli qoǵamda mańyzdy.
Odan bólek, forým barysynda ana men balaǵa qolushyn beretin daǵdarys ortalyqtary, qorlar sóz aldy.
SALTANAT SYPATILOVA, «ANA ÚIİ» QQ ÓKİLİ
Men qordyń jumysy jaıly aıtamyn. «Ana úıi» qoǵamdyq qory 10 jyl jumys jasaıdy. Osy ýaqyt ishinde biz 7000 balanyń balalar úıine túspeı, anasymen qalýyna kómektestik. Elimiz boıynsha barlyq oblystarda ana úıi bar. Biz analar men balalarǵa áleýmettik, zańdy, psıhologıalyq túrde kómek beremiz. Qazir Pavlodardaǵy ortalyqta 9 ana men 12 bala bar.
Odan bólek, forým aıasynda ana men balalarǵa kórsetiletin áleýmettik kómek, járdemaqylar týraly da aıtyldy. Esterińizge salaıyq, 12 mamyr elimizde alǵash ret anaǵa alǵys aıtý kúni atap ótiledi.