Konstıtýsıalyq Keńes Respýblıka Prezıdenti Q.K. Toqaevtyń «Qazaqstan Respýblıkasynyń Konstıtýsıasyna ózgerister men tolyqtyrý engizý týraly» Qazaqstan Respýblıkasy Zańy jobasynyń Konstıtýsıanyń 91-babynyń 2-tarmaǵyna sáıkestigin tekserý týraly ótinishi boıynsha sheshim qabyldady, dep habarlaıdy Almaty-akshamy.kz Keńestiń saıtyna silteme jasap.
Zań jobasy Konstıtýsıada Respýblıka Prezıdentiniń bir márte jeti jyldyq ókilettik merzimin belgileýdi, sondaı-aq el astanasynyń ataýyn ózgertýge baılanysty Negizgi Zańnyń 2-babyna túzetýler engizýdi kózdeıdi.
Konstıtýsıalyq Keńestiń pikirinshe, prezıdenttik jáne parlamenttik saılaý ınstıtýty memlekettiliktiń konstıtýsıalyq modeliniń barlyq komponentterin qozǵaıtyn erekshe konstıtýsıalyq qundylyq. Sol sebepti ol memlekettiń mańyzdy organdaryn jańartýdyń tıimdi quraly bolyp tabylady. Osy arqyly Respýblıkanyń áleýmettik negizi, halyqtyń memlekettik bılik bastamalaryn qoldaýy nyǵaıtylady.
Konstıtýsıalyq Keńes saılaý naýqandary kezeńinde azamattyq qoǵamnyń ártúrli segmentteri jandanatynyna nazar aýdardy. Osy jaǵdaılarda Qazaqstan Respýblıkasynyń Konstıtýsıasynda baıandy etilgen barlyq qundylyqtar serpindi ári úılesimdi is-áreket etýge tıis.
Konstıtýsıalyq Keńestiń paıymdaýynsha, prezıdenttik mandattyń bir márte jeti jyldyq merzimin belgileý aǵymdaǵy jylǵy 5 maýsymdaǵy respýblıkalyq referendýmda qabyldanǵan memlekettik bılikti monopolızasıalaýǵa jol bermeýge baǵyttalǵan konstıtýsıalyq novelalardyń mánine saı keledi.
Prezıdenttik mandatty bir merzimmen shekteıtin Konstıtýsıanyń 42-baby 5-tarmaǵynyń usynylyp otyrǵan redaksıasy atalǵan joǵary laýazymdy tulǵa laýazymyna saılanatyn barlyq adamdarǵa teń negizde qoldanylatyn bolady. Onymen Konstıtýsıalyq Sot sýdıalarynyń bir márte segiz jyldyq ókilettik merzimin anyqtaý úılesedi.
Osy oraıda, Konstıtýsıalyq Keńes «Qazaqstan Respýblıkasynyń Konstıtýsıasyna ózgerister men tolyqtyrý engizý týraly» Zań jobasy Konstıtýsıada belgilengen talaptarǵa sáıkes dep sanaıdy.
Konstıtýsıalyq Keńes qorytyndysynyń tolyq mátini buqaralyq aqparat quraldarynda jarıalanady.
Konstıtýsıalyq Keńes sheshti:
1. «Qazaqstan Respýblıkasynyń Konstıtýsıasyna ózgerister men tolyqtyrý engizý týraly» Qazaqstan Respýblıkasy Zańynyń jobasy Qazaqstan Respýblıkasynyń Konstıtýsıasyna, sonyń ishinde Negizgi Zańnyń 91-babynyń 2-tarmaǵynda belgilengen talaptarǵa, sáıkes dep tanylsyn.
2. Qazaqstan Respýblıkasy Konstıtýsıasynyń 74-babynyń 3-tarmaǵyna sáıkes Qazaqstan Respýblıkasy Konstıtýsıalyq Keńesiniń qorytyndysy qabyldanǵan kúninen bastap kúshine enedi, Respýblıkanyń búkil aýmaǵynda jalpyǵa birdeı mindetti, túpkilikti bolyp tabylady jáne shaǵymdanýǵa jatpaıdy.
3. Osy qorytyndy respýblıkalyq resmı basylymdarda qazaq jáne orys tilderinde jarıalansyn.