Rýmynıaǵa jumys sapary barysynda qazaqstandyq delegasıa halyqaralyq avtomobıl tasymaldary jónindegi birlesken komıssıanyń otyrysyna qatysty
Kólik mınıstri Marat Qarabaev bastaǵan qazaqstandyq delegasıa Rýmynıaǵa sapary aıasynda Konstansa portyndaǵy kólik-logıstıkalyq bıznes-forýmǵa jáne halyqaralyq avtomobıl tasymaldary jónindegi birlesken komıssıanyń otyrysyna qatysty. Atalǵan forým aıasynda Rýmynıanyń bıznes ókilderimen V2V formatynda kezdesýler ótti, dep habarlaıdy almaty-akshamy.kz.
İs-sharalarǵa Qazaqstan tarapynan vıse-mınıstr Talǵat Lastaev, temirjol jáne sý kóligi komıtetiniń tóraǵasy Oljas Saparbekov, KTZ Express AQ, «Aqtaý teńiz saýda porty» UK, «Transkaspıı halyqaralyq kólik marshrýtynyń» halyqaralyq qaýymdastyǵy, Semurg Invest, Dar Rail jáne PTC Holding JSHS basshylyǵynyń ókilderi qatysty.
Forýmda sóz sóılegen mınıstr Marat Kárimjanuly Qazaqstan kólik salasyn damytýǵa, Azıadan Eýropaǵa barar jolda tranzıttik tasymaldardyń jyldamdyǵy men sapasyn arttyrýǵa barlyq jaǵdaı jasap jatqanyn atap ótti. Sondaı-aq ol bıznes ókilderiniń kezdesýi Qazaqstan men Rýmynıa arasyndaǵy avtotasymaldar salasyna jańa serpin beredi degen úmitin bildirdi.
Bul kúni qazaqstandyq delegasıa Rýmynıa Kólik jáne ınfraqurylym mınıstriniń orynbasary Adrıan Fogıshtiń súıemeldeýimen Konstansa qalasyndaǵy Rýmynıadaǵy iri porttyń qyzmetimen tanysty.
Teńiz-ózen portynyń 156 aılaǵy jáne eki jalpyeýropalyq kólik dáliziniń qıylysynda qolaıly geografıalyq orny bar. Porttyń janynda Mıdıa jáne Mangalıa syndy eki spýtnıktik port ornalasqan. Atalǵan porttyń qýaty jylyna 100 mln tonna júkti quraıdy.
Konstansa portynyń múmkindikteri men artyqshylyqtary Transkaspıı halyqaralyq kólik marshrýtynyń áleýetin ashýda, sondaı-aq tranzıttik júk aǵyndarynyń kólemin ózara ulǵaıtý jáne mýltımodaldy tasymaldar men logıstıkalyq prosester salasyndaǵy ozyq tájirıbemen almasý úshin Qazaqstan men Rýmynıa arasyndaǵy yntymaqtastyqty odan ári nyǵaıtýda mańyzdy ról atqara alady.