Aqtaý garnızonyndaǵy teńiz jaıaý áskerleri quramasynyń sport kesheninde «Batys» óńirlik qolbasshylyǵy áskerleri qolbasshysynyń aýyspaly kýbogy úshin armıalyq qoıan-qoltyq urystan chempıonat ótti.
Oǵan Aqtaý, Aqtóbe, Oral, Atyraý jáne Beıneý garnızondarynan 9 salmaq dárejesinde baq synasqan 90-ǵa jýyq áskerı qyzmetshi qatysty, dep habarlaıdy almaty-akshamy.kz.
Chempıonat qorytyndysyn teńiz jaıaý áskerleri quramasynyń shtab bastyǵy maıor Saparaly Qazaqbaev shyǵardy.
– Armıalyq qoıan-qoltyq urys – Qarýly kúshterdegi eń tanymal sport túri ǵana emes, sonymen qatar áskerı qyzmetshiler úshin jaýyngerlik daǵdylaryn arttyrýdyń, dene shynyqtyrýdy jetildirýdiń, moraldyq-psıhologıalyq turaqtylyqty nyǵaıtýdyń tıimdi quraly. Jarysqa qatysýshylar jekpe-jektiń úzdik tehnıkasy men daıyndyqtyń joǵary deńgeıin kórsete bildi, – dep atap ótti ol.
Armıalyq qoıan-qoltyq urystan jalpy komandalyq esepte teńiz jaıaý áskerleri quramasynyń gvardıa maıory Mereı Muqataev basqarǵan qurama komandasy jeńimpaz atandy. Úsh birdeı altyn medaldi jeńip alǵan olar «Batys» óńirlik qolbasshylyǵy áskerleri qolbasshysynyń aýyspaly kýbogyn ıelendi. Óz salmaq dárejelerinde merzimdi qyzmettiń áskerı qyzmetshileri qatardaǵy jaýyngerler Beksultan Esteǵul men Denıs Balúktiń jeńimpazdar qatarynan kóringenin de aıta ketý kerek.
Tóreshilerdiń sheshimimen júldeli ekinshi oryn 41433 áskerı bóliminiń komandasyna buıyrsa, 30238 áskerı bóliminiń sportshylary úshinshi oryndy mise tutty.
Chempıonat jeńimpazdary men júldegerleri gramotalarmen jáne baǵaly syılyqtarmen marapattaldy.