Jambyl atyndaǵy Qazaq memlekettik fılarmonıasy kezekti maýsymyn ashty
Fılarmonıada bes tanymal ujym, sondaı-aq, búkil álemge tanymal talantty solıser bar. T. Ábdirashev atyndaǵy QR Memlekettik akademıalyq sımfonıalyq orkestri konserttik maýsymdy ataqty kompozıtorlar R.Vagnerdiń - «Trıstan jáne Izolda» operasynan «Izoldanyń kirispesi men ólimi» jáne G.Malerdiń № 1 «Tıtan» sımfonıasymen ashty, dep habarlaıdy Almaty-akshamy.kz.
Orkestrdiń kórkemdik jetekshi jáne bas dırıjer – Qanat Omarov.
Maýsym asharǵa jınalǵan klasıkalyq mýzykanyń shynaıy jankúıerleri – konsertti keremet qabyldap jáne kóterińki kóńil-kúımen qol shapalaqtaryn aıamady.
T. Ábdirashev atyndaǵy Memlekettik akademıalyq sımfonıalyq orkestri - 1958 jyly fılarmonıaǵa engizildi. Onyń uıymdastyrýshysy, jetekshisi jáne birinshi dırıjeri Qazaq KSR Halyq ártisi, Reseı halyq ártisi, Tatar ASSR Halyq ártisi Fýat Shákiruly Mansurov boldy. Aıtý kerek, onyń esimi osy ujymnyń tarıhyna altyn áriptermen jazylǵan. 20 jyldan astam ýaqyt boıy orkestrdi belgili dırıjer Tólepbergen Ábdirashev basqardy.
T. Ábdirashevtiń sheberligi álemniń kóptegen elderinde tanylǵan. Maestronyń jetekshiligimen orkestr álemdik klasıka men zamanaýı avtorlardyń shyǵarmalaryn oryndady. Kóptegen jyldar boıy Tımýr Myńbaev QR Memlekettik sımfonıalyq orkestriniń dırıjeri bolyp jumys istedi. Ol dırıjerlik, kompozıtorlyq jáne mýzykatanýshylyq qyzmetti sátti úılestirdi. Myńbaev shyǵarmashylyǵynyń mańyzdy bastaýy Qazaq ulttyq fólklory boldy. Al qazirgi ýaqytta orkestrdi daryndy jas dırıjer Qanat Omarov basqaryp keledi.