Ómir bolǵan soń aq pen qara, qýanysh pen renish qatar júretini, tún artynan kún shyǵatyny da zańdylyq. Biraq adamdar arasyndaǵy qarym-qatynasta bári jaqsy bolsa dep oılaımyz. Bir-birimizge degen iltıpat-qurmetimiz arta tússe eken deımiz. Sabyr, tózim, qaıyrym, meıirim, baýyrmaldyq tek Oraza aıymen shektelmegeı degen tilegimiz de joq emes.
AVTOBÝSTA
Qala syrtyna qatynaıtyn jalǵyz avtobýstyń aıaldamasynda adam kúnde kóp bolady. Tipti, keıde syımaı qalyp, ekinshisin, úshinshisin kútip turamyz. Biz kútken avtobýstyń tóbesi kóringennen oryn tıse eken dep bárimiz japatarmaǵaı tar esikke umtylǵanda, bireýmizdiń sómkemizdiń baýy, endi bireýimizdiń shapanymyzdyń etegi ilinip qalyp, ne ári, ne beri jyljı almaı keptelip turamyz da qalamyz. Sosyn aıqaı-shý, bir-birin ıterý, nuqyp jiberý, balaǵat sózder bastalyp ketedi. Túsinýge bolady, jumystan qaıtar keshki ýaqyt, báriniń júıkesi syr berip, qajyp, sharshap turady. Biraq osy oraza bastalǵaly bizdiń avtobýstyń jolaýshylarynda sabyr paıda bolǵan sekildi. Burynǵydaı alqyn-julqyn umtylys azaıǵandaı, aýyz bekitkeni bar, bekitpegeni bar, áıteýir, arada bir kózge kórinbes sabyr, shydam, tózim, qasıetti aıǵa degen qurmet bardaı kórinedi maǵan.
Aınanyń eki jaǵy bolatyn sekildi, biraq keshe eki áriptes metroǵa otyrǵanymyzda, qazdaı tizilip otyrǵan áp-ádemi jastardyń birde-biri ushyp turyp oryn bermedi. Oraza ǵoı qazirgi jastardyń kóbi dedik te qoıdyq. Durys. Biraq adamgershilik, qaıyrym, meıirimdi de umytpasaq eken. Oraza ustaǵanyńyz eshkimge mindet bolmaýy tıis. Jalpy, oraza ustasańyz da – ózińiz úshin, aýyzashar berseńiz de – ózińiz úshin.
ÚIDE
Keshe bir er áriptesim «maǵan syrtta, kafe, meıramhanada aýyz ashqannan góri úıde, bala-shaǵamnyń janynda ashqan jaıly» dep qaldy. Jany bar sóz. Kúni boıy túzde, jumysta, onyń ústine ashqursaq júrgen er adamnyń keshke shańyraǵyna, jaqyndaryna, aýyzasharǵa asyǵyp jetip, ózin de saǵyna kútken bala-shaǵasyn qushaǵyna qysyp, tórt kózi túgel, ortasynda otyryp, búgin kimniń ne tyndyrǵanyn surap, istegen isterin qoldap-qolpashtap qoıyp, mańdaıy terlep-tepship ishkeni shaıynyń, asynyń sińimdi bolary anyq.
Al ekinshi bir áriptesim (áıel) etjaqyn týystaryna aýyzashar berip jatyp, dastarhan jıylar sátte meımandaryna qarata: «Bárińizge rızamyn. Ómir bolǵan soń túrli jaǵdaılar bolady. Osynaý qamshynyń sabyndaı qysqa ǵumyrda, jantalasqa toly jalǵan tirlikte áldebireýińizdi renjitip alǵan, qatty aıtqan sátterim bolsa, keshirim suraımyn», – dedi. Mine, orazanyń da, aýyzashardyń da bir súnneti osy shyǵar.