Qazaqstandyqtar bir-aq sátte kompanıalarda qarjy pıramıdasynyń belgileriniń bar-joǵyn teksere alady.
Qarjylyq monıtorıń agenttigi ázirlegen Telegram messendjerindegi bot azamattarǵa qarjylyq pıramıdalarǵa tartatyn alaıaqtardyń áreketterinen qorǵanýǵa kómektesedi, dep habarlaıdy Almaty-akshamy.kz QazAqparatqa silteme jasap.
«Paıdalanýshyǵa kompanıanyń/uıymnyń saıtyna, Instagram paraqshasyna, Vkontakte tobyna nemese Telegram arnasyna https://internet.zzz (com, ru, kz jáne t.b.) nemese ınternet.zzz (com, ru, kz jáne t.b.) formatta silteme engizý jetkilikti. Sonymen qatar, sizge tabys usynatyn kompanıanyń BSN arqyly tekserýge bolady. İske qosýdyń birinshi kezeńinde Telegram messendjerinde bir akkaýnttan táýligine 5 retten kóp suraý jiberý múmkin emes», - dep jazdy agenttikten.
2022 jyly QMA qarjy pıramıdalaryn uıymdastyrý faktisi boıynsha 85 qylmystyq isti aıaqtady. Bıyl 29 qarjy pıramıdasy joıyldy. 15 is boıynsha úkim shyǵarylyp, 23 adam sottaldy.
QMA qarjy pıramıdalaryna tartatyn alaıaqtarmen belsendi kúresti jalǵastyrýda. Osyǵan oraı azamattardy qyraǵy bolýǵa jáne óz jınaqtaryn kúmándi qarjy uıymdaryna salmaýǵa shaqyrady.