Qazaqstan men Qytaı shekarasyndaǵy "Nur Joly" ótkizý pýnktinde QHR-ǵa baǵyt alǵan kólikterdiń kepteliske túskeni baıqalǵan, - dep habarlaıdy aqshamnews.kz Qarjy mınıstrliginiń Memlekettik kirister komıtetine silteme jasap.
Vedomstvo málimetinshe, otandyq tasymaldaýshylardyń shekaradan ótýge qajet sheteldik ruqsat blankileriniń bolmaýynan paıda boldy. Bul blankiler eki eldiń salalyq kólik vedomstvolary arasynda ózara aıyrbastalady.
"Qalyptasqan jaǵdaıdy retteý maqsatynda Qazaqstan Respýblıkasy Qarjy mınıstrliginiń Memlekettik kirister komıteti Kólik mınıstrligimen birlesip belsendi jumys júrgizip jatyr. Qazir Qazaqstan men Qytaıdyń salalyq vedomstvolary qazaqstandyq tarapty qosymsha sheteldik ruqsat blankilerimen qamtamasyz etý máselesi boıynsha kelissózder júrgizip jatyr", - delingen habarlamada.
Sondaı-aq, QHR-dyń Bas keden basqarmasymen de kelissózder júrgizilip jatqany atap ótildi.
"Nátıjesinde qytaı tarapy qabyldaıtyn avtokóliktiń sanyn ýaqytsha arttyrý jóninde ýaǵdalastyqqa qol jetkizildi. Sondaı-aq, qytaı ótkizý beketterinde ótkizýdi arttyrý jáne kedendik resimdeýdi jedeldetý jónindegi qosymsha sharalar kelisildi", - dep kórsetildi habarlamada.
Tasymaldaýshylardyń qarjy shyǵynyn barynsha azaıtý úshin QR QM MKK "CarGoRuqsat" elektron kezek júıesiniń ákimshisi – "AEO" AQ-men birlesip, belsendi brondardyń qoldanylý merzimin 72 saǵatqa uzartý týraly sheshim qabyldady.
"Bul tasymaldaýshylarǵa júıeniń jańartylǵan jumys qaǵıdalaryna sáıkes bron úshin tólengen 1 AEK somasyn jáne 20 AEK kólemindegi kepildik jarnany saqtaýǵa, sondaı-aq sheteldik ruqsattardyń berilýi qaıta bastalǵannan keıin ótkizý turaqtylyǵyn qamtamasyz etýge múmkindik beredi", - dep túsindirildi habarlamada.
Budan bólek, Qytaı Halyq Respýblıkasynyń Kólik mınıstrliginen "S" sanatyndaǵy jańa ruqsat blankileri partıasy túskennen keıin, ótinish berip úlgermegen otandyq tasymaldaýshylar belgilengen tártippen buryn brondalǵan kezek arqyly blankilerdi rásimdep, alýǵa múmkindik alady.
MKK jaǵdaıdyń turaqty baqylaýda ekenin habarlady. Qabyldanyp jatqan barlyq shara avtokólik ótkizý rejımin jedel qalpyna keltirýge jáne kólik aǵynynyń úzdiksiz qozǵalysyn qamtamasyz etýge baǵyttalǵan.
"Komıtet túsinistik tanytqany úshin tasymaldaýshylarǵa alǵys bildiredi jáne sheteldik ruqsat blankileriniń jańa partıasy kelgenge deıin ótkizý pýnktterine ýaqytsha barmaýdy suraıdy", - delingen habarlamada.
Eske salaıyq, qyrkúıetiń aıaǵynda Qazaqstan-Reseı shekarasynda RF tarapynan baqylaýdyń kúsheıýine baılanysty kezek paıda bolǵan edi. QR Kólik mınıstrliginiń málimetinshe, reseılik qyzmetter júkterdi tekserýdi kúsheıtip, kólikti qaraý ýaqytyn ulǵaıtty jáne qujattardy, sanıtarlyq jáne fıtosanıtarlyq talaptardy tekserýdiń qosymsha sharalaryn engizdi.