Almaty qalasynda ekologıalyq aılyqtyń bastalýyna oraı halyqaralyq Almaty Open ATP 250 týrnıri ECO Network jáne alǵashqy Eko-habpen birlesip óz alańynda ekoaımaq ashty.
Bul sporttyq is-sharalardyń ekologıa taqyrybyn, qaldyqtardy suryptap jınaý mádenıetin ilgeriletip, turǵyndardy qaldyqtardy qaıta óńdeýge arnalǵan ınteraktıvti aımaqtar arqyly tartýynyń jaqsy dástúrge aınalyp kele jatqanyn kórsetedi.
Bıyl ECO Network-pen birlesip óz is-sharalaryn ekologıalandyrý bastamasyn Almaty Marathon jáne FIDE World Cadet Chess Championships 2025 – 8, 10 jáne 12 jas aralyǵyndaǵy balalar arasyndaǵy álem chempıonaty da júzege asyrdy. Chempıonat kezinde balalar bótelke qaqpaqtarynan tikeleı chempıonat barysynda shahmat jıyntyǵyn jasap shyǵardy.
Almaty Open ATP 250 ekoaımaǵynyń biregeı bóligi – almatylyq oqýshylar ázirlegen «Almatylyq smogtan jasalǵan sıa» jobasy boldy. İs-shara qonaqtary dál osy sıamen shoperlerdi boıady.
Bul sımvoldyq mánge ıe, sebebi dál qazir Almaty qalasynyń atmosferalyq aýany qorǵaý erejeleri boıynsha qoǵamdyq tyńdaýlar ótip jatyr. Bul erejeler qalanyń smog máselesin túbegeıli sheshýge kómektesýi tıis.
«Almatylyq smogtan jasalǵan sıa» jobasynyń avtorlary:
Imantalıeva Narmınahon – №48 lıseıdiń 11-synyp oqýshysy, jobanyń negizin qalaýshy;
Sovethan Arýjan – NIS-tiń 10-synyp oqýshysy, jobanyń tehnıkalyq dırektory.
Olar 8 elden kelgen 350 jobanyń ishinde ótken halyqaralyq LaunchZone áleýmettik jobalar batlynda 2-oryn ıelendi.
Sondaı-aq, Jasyl tehnologıa ortalyǵynyń GCIP halyqaralyq akselerasıasynyń jartylaı fınalısteri atandy.
Global Startup Awards baıqaýynda Qazaqstandaǵy jyldyń úzdik jasyl tehnologıalyq startaptarynyń biri retinde nomınasıalandy.
Sonymen qatar Invest Match akselerasıalyq baǵdarlamasynyń fınalısteri boldy.
Almaty qalasynyń ákimdigi, ekobelsendiler jáne chempıonat qonaqtary Almaty Open ATP 250 uıymdastyrýshylaryna Memleket basshysy belgilegen «Taza Qazaqstan» respýblıkalyq aksıasy aıasynda ekologıalyq mádenıetti jáne qaldyqtardy bólek jınaý taqyrybyna úles qosqany úshin alǵys bildirdi.