«Kólsaı Kólderi» memlekettik ulttyq tabıǵı parkinde abattandyrý jumystary aıaqtaldy. Bul týraly ÓKQ brıfıńinde «Kólsaı Kólderi» memlekettik ulttyq tabıǵı parki dırektorynyń orynbasary Hamıt Ahmetov keńirek aıtyp berdi, dep habarlaıdy almaty-akshamy.kz
«Kólsaı Kólderi» ulttyq parki 2007 jyly Almaty oblysynyń Kegen jáne Talǵar aýdandarynyń aýmaǵynda qurylǵan. Onyń jalpy aýdany-161 045 myń gektar. Onyń ishinde Kegen aýdany boıynsha-148256, Talǵar aýdany boıynsha-12807 gektar. Ulttyq park Taýshelek, Qurmet, Kólsaı, Qarabulaq ormanshylyqtarynan turady.
«2023 jyldyń basynan beri saıabaq aýmaǵynda 99 toptyq reıd júrgizildi. Tekserý nátıjesinde park qyzmetkerleri demalýshylar arasynan 47 buzýshylyqty anyqtap, olarǵa 405 375 teńge kóleminde aıyppul salyndy. Zalal somasy 30 015 teńgeni qurady», - dedi H. Ahmetov.
Týrıserdiń qaýipsizdigin qamtamasyz etý úshin «Saty aýyly - Qaıyńdy kóli» týrısik baǵytyn abattandyrý kezinde qosymsha jol belgileri, kúrkeler men oryndyqtar ornatyldy. Almaty oblysynyń týrızm basqarmasynyń qarajaty esebinen baqylaý alańy, kúrke-shatyrlar, oryndyqtar men kópirler salynýda. Kólsaı, Qaıyńdy kólderinde 30 qoqys jáshigi men 16 úlken qoqys bagy ornatyldy.
«Tómengi Kólsaı kóli-Sarybulaq asýy» týrısik marshrýtynyń sol jaǵalaýynda demeýshilerdiń kómegimen uzyndyǵy 370 metr bolatyn jaıaý júrginshiler joly salyndy, olardyń boıynda oryndyqtar men ýrnalar ornatyldy. Almaty oblysynyń týrızm basqarmasynyń qarajaty esebinen Tómengi Kólsaı kóline aparatyn jaıaý júrginshilerge arnalǵan aınalma jol salynýda.
Sonymen qatar, 2023 jyldyń kókteminde barlyǵy 95 080 dana «Shrenka» shyrshasynyń kóshetteri otyrǵyzyldy - 13,9 gektarǵa 55 600 kóshet, tıisinshe 9,87 gektar jerge 39 480 kóshet otyrǵyzyldy. Kólsaı ormanshylyǵynan 0,06 gektar alqapqa shyrsha tuqymyn sebetin ýaqytsha orman tuqymy ýchaskesi uıymdastyryldy. 2019-2023 jyldar aralyǵynda 57,5 gektar alqapqa orman kóshetteri otyrǵyzyldy.
«Týrısik nysandarda 2 aǵash kúrke (shatyr) ornatyldy, Qaıyńdy kóliniń jaıaý júrginshiler jáne at jolynyń qorshaýlary jańartyldy, osy nysandarda áktep-syrlaý jumystary júrgizildi. Ulttyq park aýmaǵynda 10 sanıtarlyq-gıgıenalyq qondyrǵy ornalasqan, onyń 4-ýi Tómengi Kólsaı kólinde, 2-ýi Qaıyńdy kólinde jumys isteıdi», - dep jalǵastyrdy spıker.
Ulttyq saıabaqtyń aýmaǵynda sútqorektilerdiń kelesi túrleri mekendeıdi: buǵy (640), elik (397), Sibir taý eshkisi (584), qaban (646), arqar (26). Qyzyl kitapqa engizilgen janýarlardyń ishinde Tán-SHan qońyr aıýy (22), qar barysy (18), Túrkistan sileýsini (64) mekendeıdi.
Ulttyq park qyzmetkerleri memlekettik ınspektorlardy, eldi mekenderdiń turǵyndaryn, oqýshylardy, JOO stýdentteriniń ekologıalyq saýatyn arttyrý boıynsha jumystar júrgizýde. Aǵymdaǵy jyly joǵary oqý oryndary men mektepterde 25 sabaq ótkizildi.
«Jyl saıyn «Parkter sherýi» aksıasy ótkiziledi. Bıyl oǵan 9 mektepten 141 oqýshy qatysty. Uıymdastyrylǵan konkýrstardyń qorytyndysy boıynsha 27 oqýshy baǵaly syılyqtarmen marapattaldy, 12 oqýshy yntalandyrý gramotalaryn aldy. Halyqaralyq týrızm kúnine oraı, 27 qyrkúıekte merekelik is - shara uıymdastyryldy, onyń barysynda ulttyq park aýmaǵynda týrızm salasyn damytýǵa úles qosqan jeke kásipkerler marapattaldy, al mekeme qyzmetkerleri arasynda sporttyq voleıboldan jarystar ótkizildi», - dep bólisti spıker.
Onyń derekteri boıynsha ulttyq park shtatynda barlyǵy 126 adam jumys isteıdi: memlekettik ınspektorlar - 111, onyń ishinde: ormanshylar - 4, ormanshylardyń kómekshileri - 2, orman sheberleri - 17, memlekettik ınspektorlar - 71.
Ulttyq saıabaqtyń aýmaǵynda týrısik fırmalar únemi jumys isteıdi. 9 týrısik fırmamen kelisimsharttar jasaldy. 2022 jyly Ulttyq parkke 210 269 adam keldi.