Kez kelgen adamǵa kólik tańdaý - ómirindegi mańyzdy sheshimderdiń biri. Túrli modeldiń ishinen talǵamyńyzǵa tap kelgenin tańdaý ońaıǵa soqpaıtyny anyq. Keıbiri sátti kólik satyp alyp, keıin ony satyp paıda taýyp jatady. Endi biri urlanǵan kólikterge kezigip aqshasynan da, kóliginen de aıyrylýy yqtımal. Massaget.kz tilshisi kólik alarda nege mán berý keregine sholý jasady, dep habarlaıdy almaty-akshamy.kz.
Nómirler, avtokodtarǵa mán berý
Árıne, avtokólik satyp alarda saýatty tekseristen ótkizseńiz urlanǵan kólikti satyp alýdan saq bolasyz. Eń aldymen nómirler men avtokodtarǵa mán berińiz. Temir tulpardy teksergen kezde motordaǵy, korpýstaǵy nómirlerge, kodtarǵa nazar aýdaryńyz. Tipti mınımaldy túzetýlerdiń nemese syzattardyń bolýy - bul mashınany satyp alýdan bas tartýǵa sebep. Áripter men kod sandary arasyndaǵy qashyqty muqıat tekserińiz. Ol barlyq jerde birdeı bolýy kerek.
Motorda jáne avtokóliktiń basqa elementterinde bar nómirlerdi tıisti tehnıkalyq qujattamadaǵy, servıstik kitaptardaǵy engizilgen sandarmen salystyrý qajet. Eger qymbat sheteldik kólikti satyp almaq bolsańyz, bul jumystardy arnaıy mamanǵa tapsyrǵan abzal.
Kólik qańqasyn tekserý
Bul prosesti bastamas buryn ıesinen jumys barysynda qandaı elementter, bólshekter aýystyrylǵanyn surańyz. Eger satýshy eshteńe aýystyrylmaǵanyn habarlaǵan jaǵdaıda jaryqshamdarda, áınekterde, ártúrli qondyrǵylarda bar belgilerdi, kodtardy teksergen jón. Qarapaıym tekseris arqyly satýshy sóziniń jalǵandyǵyn ańǵarasyz.
Kóbine tájirıbesi joq satyp alýshylarǵa mundaı kúrdeli tekseris qıynǵa soǵady. Eger sizdiń kólikke qatysty bilimińiz taıaz bolsa, bul jumystardy senimdi kólik sarapshysyna tapsyrǵan abzal. Óıtkeni olardyń tájirıbesi ǵana emes, sonymen qatar, belgili bir múmkindikteri bar. Máselen, kólik týraly aqparat surap, tıisti organdarǵa júgine alady. Biraq olardyń jumysynyń aqysyn ózińiz tóleýge týra keledi.
Urlanǵan avtokólik satyp alý yqtımaldyǵyn azaıtý úshin siz jeke adamdardan emes, senimdi salondardan kólik tańdaı alasyz. Biraq bul jaǵdaıda da negizgi qujattamany tekserýdi umytpaý kerek.