Sonymen birge ol 7 jylǵa kólik júrgizý quqyǵynan aıyryldy
Aqtóbe qalalyq máslıhatynyń depýtaty Erbol Qasymǵalı kólikti mas kúıinde júrgizgeni úshin ákimshilik jaýapqa tartyldy. Keıin ol mandatynan bas tartyp, qalalyq aýmaqtyq saılaý komısıasyna aryz jazdy, dep habarlaıdy Almaty-akshamy.kz QazAqparatqa silteme jasap.
Aqtóbe qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynda Erbol Qasymǵalıǵa qatysty is qaraldy. İs materıalyna súıensek, kásipker ári qalalyq máslıhat depýtaty bıyl mamyr aıynda Mercedes Benz avtokóligin mas kúıinde basqarǵan. Ol Qarǵaly turǵyn úı alaby Qaıdaýyl batyr kóshesinde ustaldy. Sot otyrysy kezinde Erbol Qasymǵalı óz kinásin moıyndamady. Sonymen birge medısınalyq saraptama qorytyndysymen kelispedi. Tipti, ekinshi ret saraptamadan ótýge bolatyny týraly túsindirip aıtpaǵanyn alǵa tartty. Al dáriger T.Berkýtbaev onyń sózin joqqa shyǵaryp, shyn máninde jeńil masań kúıde bolǵanyn aıtyp berdi.
Aqtóbe qalasynyń ákimshilik quqyq buzýshylyqtar jónindegi mamandandyrylǵan aýdanaralyq soty Ákimshilik quqyqbuzýshylyq kodekstiń «Júrgizýshiniń kólik quralyn alkogóldik, esirtkilik jáne ýytqumarlyq masań kúıde basqarýy, sol sıaqty kólik quralyn alkogóldik, esirtkilik jáne ýytqumarlyq masań kúıdegi adamnyń basqarýyna berý» baby boıynsha Erbol Qasymǵalıdy kináli dep tanyp, ony 15 táýlikke qamaý týraly sheshim shyǵardy. Sonymen birge ol 7 jylǵa kólik júrgizý quqyǵynan aıyryldy.
Aqtóbe qalalyq aýmaqtyq saılaý komısıasynyń tóraǵasy Baǵlanbek Qurmanalınniń aıtýynsha, Erbol Qasymǵalı depýtattyq mandatynan bas tartyp, aryz jazǵan. Aryz qabyldandy.