Kólik vıse-mınıstri Sátjan Ablalıev kóktem jáne jaz maýsymdarynda joldardy paıdalaný ári kútip-ustaý máseleleri boıynsha keńes ótkizdi.
Jıynǵa «QazAvtoJol» ulttyq kompanıasy, Jol aktıvteri sapasynyń ulttyq ortalyǵy jáne «Qajservıs» JSHS oblystyq fılıaldarynyń basshylary qatysyp, kezdesý barysynda joldardy sý tasqyny kezeńine daıyndaý máseleleri jáne jol qaýipsizdigin qamtamasyz etý jónindegi keshendi maqsatty baǵdarlama aıasyndaǵy jumys josparlary talqylandy, dep habarlaıdy Almaty-akshamy.kz QR Kólik mınıstrligine silteme jasap.
Kún tártibine shyǵarylyp, talqylanǵan basty másele – qalyń qardyń erýi men sý tasqyny bolýy yqtımal joldarda qozǵalys qaýipsizdigin qamtamasyz etý jáne jol ınfraqurylymyn saqtap qalý máseleleri boldy.
Talqylaý barysynda sý tasqyny bolýy yqtımal respýblıkalyq trassalarda qaýipsizdikti saqtaý maqsatynda birlesken is-qımyldyń jedeldigi men durys úılestirilýiniń mańyzdylyǵy atap ótildi. Sonymen birge jol qurylystaryn nyǵaıtý, ınertti materıaldar men qaptardy daıyndaý, joldardyń jaı-kúıin baqylaý máseleleri sóz boldy.
Budan basqa qaýipsizdikti qamtamasyz etý jónindegi keshendi maqsatty baǵdarlamany iske asyrýǵa engizilgen jospardyń júzege asyrylýy qaraldy. Atalǵan is-sharalar shuńqyrlardy jóndeý, jaryqtardy toltyrý, jol belgilerin ornatý jáne aýystyrý jumystaryn qamtıdy. Baǵdarlama sheńberinde qarastyrylǵan is-sharalar kesheni jol qozǵalysyna qatysýshylardyń qaýipsizdigin qamtamasyz etýge baǵyttalǵan.
Jıyndy qorytyndylaǵan vıse-mınıstr maqsatty baǵdarlamany iske asyrý barysynda barlyq qurylymdyq bólimsheniń kelisilgen jumysynyń qajettiligin atap ótip, sý tasqyny kezeńinde jol qozǵalysy qaýipsizdigin qamtamasyz etý boıynsha qoıylǵan mindetterge erekshe nazar aýdardy.