Avtokólik zıandy zattardyń shyǵarylý sheginen asyp ketse, kólik ıesin qandaı jaza kútip tur? Bul týraly Tengri Auto tilshisi Ulttyq ekonomıka mınıstrligine saýal joldaǵan.
Qazaqstan zańnamasyna sáıkes avtokólik ıeleri atmosferaǵa zıandy zattardyń shyǵaryndylary boıynsha belgilengen normalardy saqtaýǵa mindetti.
Búgingi kúni shyǵaryndylaryndaǵy lastaýshy zattardyń mólsheri, sondaı-aq otaldyrǵan kezinde shyǵaratyn shý deńgeıi belgilengen normatıvterden asatyn avtokólikterdiń ıesine eskertý jasalady nemese aıyppul salýǵa ákep soǵady. Sonymen aıyppul kólemi qandaı?
- jeke tulǵalarǵa 10 AEK nemese 36 920 teńge;
- zańdy tulǵalarǵa 100 AEK nemese 369 200 teńge.
Jaza qoldanylǵannan keıin bir jyl ishinde qaıtalap buzǵany úshin aıyppul salynady:
- jeke tulǵalar úshin – 20 AEK 73 840 teńge;
- zańdy tulǵalar úshin – 200 AEK nemese 738 400 teńge.
Shyǵaryndylar sheginen asyp ketse, nómirdi alyp qoıýǵa bola ma?
«ÁQBtK-niń 797-baby 1-bóliginiń 3 tarmaqshasynda sýbektiniń ákimshilik jaza qoldanylǵannan keıin bir jyl ishinde osy kodekstiń 334-babynda kórsetilgen buzýshylyqtar jasalǵan kezde ýákiletti laýazymdy adam kólik quralyn paıdalanýǵa tyıym salý sebepteri joıylǵanǵa deıin memlekettik tirkeý nómiri belgilerin alyp qoıý arqyly kólik quraldaryn paıdalanýǵa tyıym salýǵa quqyly. Sonymen birge, zań jobasy aıasynda atalǵan sharany zań buzýshylyqtar bastapqy anyqtalǵan jaǵdaıda qoldaný usynylady, óıtkeni qazirgi ýaqytta zań boıynsha mundaı kólikterdi paıdalanýǵa tyıym salynǵan», - dep habarlady Ulttyq ekonomıka mınıstrligi.
Alaıda, İshki ister mınıstrligi bul bastamany qoldamady. Óıtkeni kólikti júrgizý úshin júrgizýshi kólikti jóndep, kóliktiń qalypty jaǵdaıyn saqtaýy kerek. Sáıkes kelmegen jáne qaıtalap anyqtaǵan jaǵdaıda memlekettik nómir tárkilenedi.
Esterińizge sala keteıik, «Dóńgelekti kólik quraldarynyń qaýipsizdigi týraly» KO 018/2011 Tehnıkalyq reglamentine sáıkes benzındi avtomobılderdi tekserý kezinde gaz analızatorlarynyń kórsetkishteri kelesi CO standarttarynan aspaýy kerek:
*nmin (eń az aınalymdar) – 1100 aın/mın, M1 jáne N1 sanatyndaǵy avtomobılder úshin, 900 aın/mın – basqa sanattaǵy avtomobılder úshin;
* npov (jyldamdyqty arttyrý) - 2000–3500 aın/mın deıin, M1 jáne N1 sanatyndaǵy avtomobılder úshin, 2000–2800 aın/mın – basqa sanattaǵy avtomobılder úshin.