Kúni keshe áleýmettik jelide «Kóktóbe» demalys ornyna jeke kólikpen shyǵý quny 7 myń teńge bolǵany týraly aqparat taraǵan edi. Osy jaǵdaıǵa qala turǵyndary men qonaqtary narazylyq bildirip, baǵanyń tym qymbat ekenin aıtyp shaǵymdandy. Almatylyq turǵyndardyń aıtýynsha, qarajattyń qaıda ketip jatqany belgisiz jáne otbasyly adamdar úshin «Kóktóbege» kólikpen kirýge jaǵdaı qarastyrylýy kerek.
Qala turǵyny Saltanat Soltanqulovanyń aıtýynsha, 7 myń teńge qarapaıym otbasy úshin qymbat. «Qalada tursaq ta, demalys oryndaryna sırek baramyz. Osy aptada bala-shaǵamyzben «Kóktóbege» keldik. Eń úlkeni 7 jasta, kishisi 1 jasta bolǵandyqtan, kólikpen shyǵýdy jón kórdik. Eger kólikpen ótkilerińiz kelse, 7 myń teńge tóleńizder dedi. Shynymyzdy aıtsaq, ań-tań boldyq. Bul baǵa tym qymbat bolǵasyn, Gazelmen kóterildik. Qaltamyzǵa biraz aýyrlyq túsirdi. Mundaı baǵa bizdiń qalamyzǵa tym qymbat emes pe? Kún saıyn demalys ornyna 100-den astam kólik kiredi. Kúnine 7 mln teńge tabys tabady delik. Tabıǵatty qorǵaý maqsatynda osyndaı shara qabyldasa, múldem kólikpen júrýdi shekteý qajet qoı», – deıdi ol.
Turǵynnyń shaǵymyna «Kóktóbe» ákimshiligi jaýap berdi. Olardyń aıtýynsha, baǵanyń ósýine saıabaqtaǵy avtoturaqtar sanynyń azdyǵy sebep bolyp otyr.
«Saıabaqtyń aýmaǵynda avtoturaq oryndarynyń azdyǵynan kólikpen kirý baǵasy 1 mamyrdan bastap 5 myń teńgeden 7 myń teńgege kóterildi. Jalpy, saıabaqqa kirý tegin. Sol úshin turǵyndar men qonaqtar saıabaqtyń jumys ýaqytynda jaıaý da kóterile alady. Al jeke kólikpen kelgenderdi kirý qunyn tólegennen keıin joǵarǵy turaq aımaǵyna ótkizemiz», – deıdi «Kóktóbe» ákimshiligi.
- Ekobelsendiler men tabıǵat janashyrlary demalys saıabaǵyna kólikpen kóterilýge qarsy ekenderin aıtady. Al Almaty syndy alyp shaharda mıllıonǵa tarta kólik bar. Aýaǵa zıandy zattardyń 65 paıyzyn taratatyn kólikter qorshaǵan ortaǵa áser etip, aýanyń lastanýyna, adam densaýlyǵyna qaýip tóndiredi. «Adamdar salaýatty ómir saltyn saqtap, eń bolmasa saıabaqtarda jaıaý nemese velosıpedpen júrýge tyrysý kerek. Eger saıabaqqa kelip, kólikpen aýany lastasańyz, tabıǵatqa qıanat keltirgenińiz», – deıdi Ekologıa departamenti janyndaǵy jastardyń ekologıalyq bastamalary keńesiniń tóraǵasy Ádil Nurpeıisov.
Aıta ketken jón, «Kóktóbe» demalys ornyna kirýdiń 4 joly bar. Abaı– Dostyq dańǵylynyń qıylysynan №99, №95 avtobýstarmen sońǵy aıaldamaǵa deıin baryp, ary qaraı jaıaý jetýge bolady. Ekinshi joly Abaı alańy janynan aspaly jolmen kóterilý. Sondaı-aq, jeke kólikpen jáne saıabaq ákimshiligi usynǵan Gazel arqyly kóterilýge bolady.