Qazaqstan Respýblıkasy Qarýly kúshteriniń Memlekettik áskerı-tarıhı mýzeıinde Qazaq ulttyq óner ýnıversıtetiniń koleji men kórkemsýret fakúlteti stýdentteriniń avtorlyq jumystarynan turatyn «Kóktemniń lebi» kórmesiniń ashylýy ótti.
Uıymdastyrýshylar kórmeni Halyqaralyq áıelder kúni men Naýryz meıramyna oraılastyryp otyr. Stýdentter keskindeme, grafıka, músin, senografıa, sándik-qoldanbaly óner jáne dızaın sekildi óz eńbekterin usyndy. Murajaıdyń atrıým zalyna barlyǵy 65 jumys qoıylǵan. Kórmeniń taqyrybyna sáıkes, olardyń bári kóktemgi tústermen jasalǵanyn ańǵarýǵa bolady.
Ulttyq áskerı-patrıottyq ortalyqtyń bastyǵy Arman Asenov pen Memlekettik áskerı-tarıhı mýzeıdiń bastyǵy Lázzat Áljan jınalǵandardy kórmeniń ashylýymen quttyqtady. Olar jas avtorlarǵa shyǵarmashylyq jolda sáttilik tilep, alǵystaryn jetkizdi.
– Bizdiń Qazaq ulttyq óner ýnıversıtetimen yntymaqtastyǵymyz birinshi jyl emes. 2022 jyly Áskerı-tarıhı mýzeı men ýnıversıtet arasynda memorandým jasalǵan bolatyn. Búgingi is-sharamyz sol kelisimniń jumys istep turǵanyn kórsetedi, – dep atap ótti L. Áljan.
Qazaq ulttyq óner ýnıversıteti kórkemsýret fakúltetiniń dekany Ǵaını Muhtarova atap ótkendeı, bul áskerı-tarıhı mýzeıdiń qoldaýymen ótkizilip turǵan úshinshi kórme.
– Ekspozısıada stýdentterdiń semestr boıy oryndaǵan jumystary usynylyp otyr. Biz áskerı mýzeı basshylyǵyna óz shyǵarmashylyǵyn keńinen nasıhattaýda stýdentterdi qoldaǵany úshin alǵys aıtamyz, – dep qosty ol.
İs-shara barysynda stýdentter qazaqtyń ulttyq kıiminde defıle ótkizip, kórermenge konserttik baǵdarlama usyndy.