Memleket basshysynyń 2025-jyldyń kóktemgi egin egý men kúzgi jıyn-terim jumystaryn erte qarjylandyrý jónindegi tapsyrmasyna sáıkes, jeńildetilgen nesıe berý boıynsha ótinimderdi qabyldaý 2024- jyldyń 29-qarashasynda bastaldy.
ASHM málimetine saı, bul shara fermerlerdiń qajet tuqymdy, tyńaıtqyshty, ósimdik zıankesterine qarsy dári-dármekterdi erte satyp alyp, tehnıkalaryn jaraqtap, egin egý naýqanyn sapaly júrgizýleri úshin qabyldandy, dep habarlaıdy aqshamnews.kz.
«Agrarlyq nesıe korporasıasy» AQ «Keń dala 2» baǵdarlamasy aıasynda jyldyq syıaqy mólsherlemesi 5% bolatyn jeńildetilgen nesıe berý jumysyn bastap ketti. Qazirgi tańda jalpy somasy 153,9 mlrd teńgeni quraıtyn 1337 aýyl sharýashylyǵy taýar óndirýshisi Korporasıaǵa júgingen. Onyń ishindegi jalpy somasy 136,2 mlrd teńge bolatyn 1002 fermerdiń ótinimi qaralýda. Al 674 fermer kóktemgi egin egý naýqanyna 100,2 mlrd teńge nesıe qarjylaryn alyp úlgerdi.
Aqmola, Qostanaı jáne Soltústik Qazaqstan oblystary sıaqty astyqty aımaqtardyń egin egetin fermerleri arasynda belsendilik joǵary ekeni baıqalýda.
«Maksımovskoe» JSHS «Keń dala 2» baǵdarlamasyna qatysý úshin ótinim bergen alǵashqy sharýashylyqtardyń biri boldy.
«2024-jylǵy kóktemgi egis jumystary bastalar aldynda bizge «Keń dala 2» baǵdarlamasy boıynsha nesıe alý usynyldy. Biz 500 mln teńge kóleminde qarajat aldyq, ósimdikterdi qorǵaý quraldary men tyńaıtqyshtarǵa qatysty barlyq mindettemelerdi ótedik. Egin jınaý jumystaryn sátti aıaqtap, qaryzymyzdy japtyq. 2025-jyldyń kóktemgi egis jumystaryn erte qarjylandyrý jumystarynyń arqasynda biz qazirdiń ózinde 800 mln teńge aldyq. Bul teńdessiz baǵdarlama. Aýyl sharýashylyǵy óndirýshileri úshin budan jaqsysyn tabý múmkin emes dep oılaımyn», – dedi «Maksımovskoe» JSHS dırektory Aleksandr Zakýsılov.
Eske sala keteıik, Prezıdenttiń tapsyrmasyn oryndaý aıasynda kóktemgi egin egý men kúzgi jıyn-terim jumystaryna 700 mlrd teńgege deıin qarajat bólinedi, onyń shamamen 560 mlrd teńgesi naryqtyq kapıtal kózderinen tartylady. Úkimet qabyldaǵan sharalar fermerlerge eń qolaıly sharttarmen qarjylyq qoldaý alýǵa múmkindik beredi.
Sondaı-aq, qaryzdardy rásimdeý men óteý úshin júginýge bolatyn qarjy ınstıtýttarynyń sany kóbeıtildi. Qarjylandyrý ekinshi deńgeıli bankter, nesıe seriktestikteri, áleýmettik-kásipkerlik korporasıalar men Agrarlyq nesıe korporasıasy arqyly qoljetimdi bolady.
Kepildik jetispeýshiligin sheshý maqsatynda «Damý» kásipkerlikti damytý qory nesıe somasynyń 85%-yna deıin kepildik berýdi qarastyrǵan.