Danıar Qobylandın Búkilálemdik Kókpar qaýymdastyǵynyń Prezıdenti bolyp saılandy.
Dúnıejúzilik kókpar qaýymdastyǵyna Danıar Qobylandın basshy boldy. Mundaı sheshimdi birlestik músheleri kezekti konferensıada ashyq daýys berý arqyly qabyldady, dep habarlaıdy almaty-akshamy.kz
Danıar Jańabaıuly 1984 jyly dúnıege kelgen. QR Prezıdenti janyndaǵy Memlekettik basqarý akademıasynyń magıstri, Prezıdent ákimshiligi men Kólik mınıstrliginde jaýapty qyzmetter atqarǵan. 2013 jyldan beri elimizdegi bedeldi kásipkerlerdiń biri bolyp sanalady.
Dene shynyqtyrý jáne sport salasynda mol tájirıbesi bar. 2018-2022 jyldar aralyǵynda «Aýdaryspaq» federasıasynyń Prezıdenti bolyp, nátıjeli eńbek etti.
«Úlken senim úshin barshańyzǵa alǵys bildirgim keledi. Men qaýymdastyqtyń qyzmetin joǵary deńgeıge kóterý úshin barlyq kúshimdi salyp, múmkindikterdi paıdalanamyn. 2024 jyly Qazaqstannyń astanasy Astana qalasynda Dúnıejúzilik Kóshpendiler oıyny ótedi. Iaǵnı, moınymyzda úlken jaýapkershilik tur. Sondaı-aq, aldymyzda ulttyq jáne dástúrli at sporty oıyndaryn odan ári damytý boıynsha úlken mindetter bar. Iá, túrli elderde oıynnyń ataýy ártúrli, biraq oıyn erejesi birdeı» - dedi Qobylandın.
Sondaı-aq, forýmda Vengrıanyń kókpar qaýymdastyǵyn (koborı) jáne Pákistannyń býzkashı federasıasyn Dúnıejúzilik kókpar qaýymdastyǵynyń quramyna qosý týraly sheshim qabyldandy.
Aıta keteıik, atalǵan jıynnyń ekinshi kezeńin 28 qazanda Almatyda ótkizý josparlanyp otyr. Onda ulttyq jáne dástúrli at sporty oıyndaryn odan ári damytý jónindegi shuǵyl mindetter jáne Dúnıejúzilik kókpar qaýymdastyǵynyń Jarǵysyna ózgerister men tolyqtyrýlar engizý máseleleri qaralady.