Keshe Azıa oıyndarynda Qazaqstan komandasy eki altyn, bir kúmis jáne alty qola medal jeńip aldy.
Stend atýdan skıt baǵdarlamasy boıynsha aralas komandalyq saıysta óner kórsetken Ásem Orynbaı/Edýard Eshenko jubynyń juldyzy jarqyrady. Fınalda Kýveıt sportshylarynan bási bıik bolyp, altynnan alqa taqty. Al 10 metr qashyqtyqtan jyljymaly nysanaǵa oq atý saıysynda 18 jastaǵy Zýharaǵa teń keletin eshkim bolǵan joq. Sóıtip, altyn alqaǵa qol jetkizdi. Al 10 metr qashyqtyqtan jyljymaly nysanaǵa oq atý saıysynda Qazaqstan áıelder quramasy (Zýhra Irnazarova, Fatıma Irnazarova, Aleksandra Sadýaqasova) 2-orynǵa ıe bolyp, kúmis medaldi mise tutty.
Jaǵajaı voleıbolynan juptyq básekede Dmıtrıı Iakovlev pen Sergeı Bogatý qola medal úshin machta Iran komandasyn jeńdi, esep 2:0 (25:23, 30:28).
Sporttyq gımnastıkadan at snarádynda óner kórsetken 25 jastaǵy Narıman Qurbanov qola júldege ıe boldy. Otandasymyz 15.100 upaı jınady.
Al 50 metrge baterfláı ádisimen júzý jarysynda Ádilbek Mýsın qolany qanaǵat tutty. Bul sportshynyń osy Azıa oıyndaryndaǵy ekinshi qola medali. Ol 100 metr qashyqtyqtaǵy osy ádis boıynsha da qolaǵa qol jetkizgen bolatyn.
Taekvondodan ulttyq quramanyń sportshylary Denız Jansel (+67 kg) jáne Smaıyl Dúısebaı (+80 kg) Azıa oıyndarynyń qola júldegerleri atansa, semserlesýden erler quramasy (Muhamedalı Rahmanáli, Nazarbaı Sattarhan, Janat Nábıev, Artem Sarkısán) komandalyq jarysta úshtikter qatarynan kórinip, qolany qolqa tutty.
Aslanbek Shymbergenov qytaılyq qarsylasyn jeńip, bokstan jarystyń kelesi kezeńine ótti. 5x5 basketbolda Qazaqstannyń erler komandasy BAÁ quramasyn 59:49 esebimen jeńiske jetse, 3x3 basketbolda Taılandtyq qarsylastaryn 19:16 esebimen jeńdi.
Kırıll Gerasımenko ústel tenısinen 1/8 fınalda vetnamdyq sportshyny 4-0 esebimen senimdi túrde jeńdi. Sý dobynan áıelder quramasy da nátıjeli oıyn kórsetip, Ońtústik Koreıalyq qarsylastaryn 24:4 esebimen jeńdi.
5-shi jarys kúniniń qorytyndysy boıynsha Qazaqstan quramasynyń qorjynynda 3 altyn, 3 kúmis jáne 16 qola júlde bar.