Ekologıa jáne tabıǵı resýrstar mınıstri Zýlfıa Súleımenova klımattyq ózgeristiń qandaı saldary bolatynyn túsindirdi, dep habarlaıdy Almaty-akshamy.kz.
«Klımattyq ózgerister saldary Ortalyq Azıa aýmaǵyn shóleıtke, bıologıalyq sanalýandyqtyń, muzdyqtardyń azaıýyna, sý resýrstarynyń sarqylýyna jáne ekstremaldy gıdrologıalyq qubylystarǵa alyp keledi. Atalǵan máselelerdi sheshýde bizden klımattyń ózgerýine beıimdelý jáne saldaryn azaıtý boıynsha shuǵyl sheshim qabyldaýdy talap etedi», - dedi Zýlfıa Súleımenova elordada ótip jatqan III ECOJER halyqaralyq kongresinde.
Mınıstrdiń aıtýynsha, klımat ózgerisi problemalaryn sheshýdegi halyqaralyq damý trend ındýstrıalyq kún tártibinen klımattyq kún tártibine kóshý.
«Búginde kómir salasyna ekonomıkalyq qysym kúsheıip keledi. İri qarjy ınstıtýttary jasyl tehnologıanyń paıdasyna kómirmen baılanysty jobalardan múldem bas tartty. Osy oraıda álem ekonomıasyn dekarbonızasıalaýdyń turaqty úrdisi baıqalady», - deıdi vedomstvo basshysy.
Sondaı-aq, Zúlfıa Súleımenova Qazaqstan Parıj kelisimi maqsatyna jetý jolynda jahandyq kún tártibin tolyǵymen qoldaıtynyn aıtty.
«Onyń dáleli - elimizdiń 2060 jylǵa deıin kómirtegi beıtaraptyǵyna qol jetkizý strategıasyn bekitýi. Strategıada birneshe mańyzdy baǵyt qarastyrylǵan», - dep tolyqtyrdy ekologıa mınıstri.
Aıta keteıik, elordada III ECOJER halyqaralyq kongresi ótip jatyr.