Kópshilikke qaryz bolyp qalǵanyn aıtyp polısıaǵa óz aıaǵymen barǵan.
Qaraǵandyda turǵyndarǵa jalǵan týr satqan fırma dırektory 3 jylǵa sottaldy. 28 jastaǵy Olga Pojematkına shetelge demalýǵa barmaq bolǵandardyń 11 mıllıon teńgesin jınap, qaıtarmaǵan, týrdy da uıymdastyrmaǵan, dep habarlaıdy Almaty-akshamy.kz.
"Pojematkına Olga Anatolevna QR QK 190-baby, 3-tarmaǵynyń. - 1 jáne 3-pýnkine sáıkes kináli dep tanylyp, úsh jyl bas bostandyǵynan aıyrý jazasy belgilendi. Jazasyn ortasha qaýipsiz rejımdegi mekemede óteıdi. Osyǵan deıin úıqamaqta bolǵan ol sot zalynda ustalyp qamaýǵa alynsyn", – dedi sýdıa Aıgúl Myrzabekova.
KTK telearnasynyń habarlaýynsha, tergeý kezinde úıqamaqta otyrǵan Olga Pojematkınaǵa bul úkimdi estigende eseńgirep qalǵan. Óıtkeni ol is qozǵala bastaǵanda kúıeýimen ajyrasyp, jalǵyzbasty ana statýsyn alǵan. Emizýli balasy da bar.
Kópshilikke qaryz bolyp qalǵanyn aıtyp, polısıaǵa óz aıaǵymen barǵan. Sondyqtan is azamattyq sotqa aýysyp, ári ketse, shartty jaza bolady dep úmittengen. Alaıda sot tergeýi onyń alaıaqtyqty qasaqana jasaǵanyn dáleldedi. Sol sebepti ózin qamaýǵa alynsyn, al balasynyń taǵdyryn qamqorshylyq organdary sheshsin degen úkim kesti. Aldanyp qalǵan týrıserdiń aqshasyn qaıtarýǵa da mindetteldi. Degenmen, zardap shekkender qarajatyna jyldam qol jetkizetinine senbeıdi.
"Shyǵynymyz 2 mıllıon 580 myń teńge. Otbasym – úsh balam, joldasym, bes adambyz, Túrkıaǵa baramyz dep úmittengenbiz. Meniń oıymsha, bizdiń qateligimiz – fırmanyń qujattaryn teksermedik", - deıdi Aısulý Bekjigitova.