2024 jyldan bastap 5G oblys ortalyqtaryna engizile bastaıdy.
Jyl sońyna deıin respýblıkalyq mańyzy bar qalalar 15 paıyzǵa 5G ınternetimen qamtylady dep kútilýde. Bul týraly QR Sıfrlyq damý mınıstrliginiń Telekomýnıkasıa komıtetiniń tóraǵasy Erjan Meıramov málim etti, dep habarlaıdy Almaty-akshamy.kz QazAqparatqa silteme jasap.
«5G engizý respýblıkalyq mańyzy bar úsh qalada (Astana, Almaty, Shymkent) pılottyq rejımde júrip jatyr. Ótken jyldyń jeltoqsanynda 5G radıojıilikterine aýksıon uıymdastyryldy. Sonymen qatar baılanys operatorlaryna lısenzıalyq mindetter júkteldi. Oǵan sáıkes, bıyl jyl sońyna deıin Astana, Almaty jáne Shymkent qalasy 15% 5G ınternetpen qamtylýy tıis. Al 2027 jylǵa qaraı atalǵan qalalardyń 75% 5G engiziledi. Sol sıaqty 2024 jyldan bastap 5G oblys ortalyqtaryna engizile bastaıdy», - dedi Erjan Meıramov atalǵan mınıstrliktiń keńeıtilgen alqa otyrysynan keıin BAQ ókilderiniń saýalyna jaýap bere turyp.
Aıta ketsek, Úkimet basshysy elimizde 5G engizýdi 2027 jylǵa deıin aıaqtaýdy tapsyrǵan edi.
«Mınıstrlik uıaly baılanys pen ınternettiń sapasyna taldaý júrgizýi qajet. Sonyń negizinde tıisti is-sharalar ázirlenip, ol «Qoljetimdi ınternet» ulttyq jobasy sheńberinde qabyldanýy tıis. Búginde elimizde 5G uıaly baılanysyn engizý jumystary júrip jatyr. Birinshi kezekte respýblıkalyq mańyzy bar qalalar men oblys ortalyqtaryn qamtý josparlanyp otyr. Atalǵan jumys 2027 jyly aıaqtalýy kerek», - degen mindet júktedi Álıhan Smaıylov.
Eske salaıyq, byltyr jeltoqsanda elimizde alǵash ret 5G úshin radıojıilikterge ashyq aýksıon ótken edi.