Bıbigúl Tólegenovanyń Hİİ Halyqaralyq vokalıster konkýrsynyń jeńimpazdary anyqtaldy
17 qyrkúıek kúni Almatyda Abaı atyndaǵy Qazaq ulttyq opera jáne balet teatrynda Bıbigúl Tólegenovanyń Hİİ Halyqaralyq vokalıster konkýrsynyń laýreattarynyń qatysýymen gala-konsert ótti.
Marapattaý keshine QR Mádenıet jáne aqparat mınıstrliginiń jáne Almaty ákimdiginiń ókilderi men Bıbigúl Tólegenovanyń Hİİ Halyqaralyq vokalıster konkýrsynyń qazylar alqasy qatysty. Konkýrstyń áleýmettik seriktesi - «Samruk-Kazyna Trust» Áleýmettik jobalardy damytý qory.
Keshte konkýrsqa qatysqandar ishinde arnaıy syılyq ıegerleri men Gran-prı jeńimpazdyń esimi anyqtaldy. Sonymen bıylǵy nátıje boıynsha Ázirbaıjan astanasy – Bakýden kelgen Mahır Tagızade Bıbigúl Tólegenovanyń Hİİ Halyqaralyq vokalıster konkýrsynyń jeńimpazy atandy.
1 premıa jáne laýreat atanǵandar:
Azıza Omarova – Astana, Qazaqstan
Abylaı Beken – Astana, Qazaqstan
2 premıa jáne laýreat atanǵandar:
Nurǵalym Amanbaı – Almaty, Qazaqstan
Atash Karaev – Baký, Ázirbaıjan
Lánsze Hao – Szybo, Qytaı
3 premıa jáne laýreat atanǵandar:
Aıajan Qýanyshálıeva – Almaty, Qazaqstan
Dıar Nursultanov – Almaty, Qazaqstan
Maqsat Samatov – Almaty, Qazaqstan
Galına Solakán – Erevan, Armenıa
Qazaqstan kompozıtorlarynyń týyndysyn sheber oryndaǵany úshin marapattalǵandar:
Mahır Tagızade - Baký, Ázirbaıjan
Arnaıy syılyq ıegerleri:
Bıbigúl Tólegenovanyń repertýarynan Qazaqstan kompozıtorlarynyń ánderin úzdik oryndaǵany úshin marapattalǵandar:
Aıbek Haırýlla (Astana, Qazaqstan)
Márıamgúl Tólegenova atyndaǵy «Úmit» syılyǵyn ıelengender:
Joıan Iý (Qytaı)
Konkýrstyń úzdik konsertmeısteri atanǵandar:
Vıktorıa Ivanova – Reseı
Zárý Jazyqbaeva – Qazaqstan
Konkýrstyń qazylar alqasynyń tóraıymy, KSRO jáne Qazaqstannyń halyq ártisi, Sosıalısik Eńbek Eri, KSRO jáne Qazaqstannyń Memlekettik syılyqtarynyń ıegeri, akademık, qazaq klasıkalyq óneriniń bulbuly Bıbigúl Tólegenova arnaıy quttyqtaý sózin arnady:
«Bizdiń vokaldyq konkýrstyń barlyq qatysýshylaryn, jas talantty oryndaýshylardy shyn júrekten quttyqtaı otyryp, osy baıqaýǵa qoldaý bildirgen QR Mádenıet jáne aqparat mınıstrligine jáne mınıstr A.Balaevaǵa, Almaty ákimdigine, «Samruk-Kazyna Trust» Áleýmettik jobalardy damytý qoryna, Abaı atyndaǵy Qazaq ulttyq opera jáne balet teatryna jáne bizdiń barlyq demeýshilerimizge alǵys bildiremin. Olardyń qoldaýynyń arqasynda konkýrs oıdaǵydaı ótti. Bıbigúl Tólegenovanyń Halyqaralyq vokalıster konkýrsy Bıbigúl Tólegenovanyń jeke konkýrsy emes, bul Qazaqstan týraly, el mádenıetiniń ıgiligi. Konkýrs eń aldymen Qazaqstannyń atyn shyǵaratyn joba. Biz tek munaımen, gaz, ýran jáne bıdaıymyzben ǵana baı emespiz, biz mádenıetimizben, joǵary deńgeıdegi klasıkalyq ónerimizben de baımyz. Bul baıqaý Ortalyq Azıa elderindegi klasıkalyq ónerdegi jalǵyz joba bolǵandyqtan bizdiń konkýrsqa qatysý úshin alys jáne jaqyn shetelderden kóptegen talant ıeleri kelip, kásibı opera jáne konserttik kameralyq ánshiler jınalady. Bul biz úshin jetistik, qýanysh. Bıylǵy konkýrs ádettegideı joǵary deńgeıde ótti. Konkýrsta jańa esimder ataldy, klasıkalyq ónerdiń jas qarlyǵashtary qanattaryn qaqty jáne olar Bıbigúl Tólegenovanyń Halyqaralyq vokalıster konkýrstynyń laýreattary atanady. Bul degenimiz Qazaqstannyń maqtanyshy. Dál osy konkýrstyń laýreattary álemdik sahnaǵa shyǵyp, Qazaqstannan shyqqan ánshiler elimizdiń atyn shyǵarady».
Bıbigúl Tólegenovanyń Hİİ Halyqaralyq vokalıster konkýrsynyń jeńimpazy Mahır Tagızade jýrnalıserge bergen suhbatynda: «Qýanyshym qoınyma syımaı tur, bul konkýrsqa úsh ret qatysqym kelse de birde bir jol túspegen edi. Endi mine, qatysyp, jeńimpaz atandym. Men óz elimdegi jáne basqa da kóptegen halyqaralyq konkýrstarǵa qatysqanmyn. Bul joly Almatyda, Qazaqstanda, Bıbigúl Ahmetqyzynyń Otanynda ótken baıqaýǵa qatysqanyma óte qýanyshtymyn. Qazaqstandy ekinshi úıim dep sanaımyn. Konkýrs talaby boıynsha biz qazaq romansyn oryndadyq, odan ózge ózimniń jeke qalaýym boıynsha fınalda «Abaı» operasynan arıa oryndadym. Qazaqtyń klasıkalyq mýzykasyn oryndaý janyma rahat syılaıdy».
Gala-konsertte Abaı atyndaǵy Qazaq ulttyq opera jáne balet teatrynyń sımfonıalyq orkestriniń súıemeldeýimen (dırıjeri E.Ahmedárov) konkýrs laýreattary eń tanymal qazaq jáne sheteldik klasıkalyq ánderdi oryndap, tyńdarmannyń qulaq quryshyn qandyrdy.
Aıta keteıik, Bıbigúl Tólegenovanyń Halyqaralyq vokalıster konkýrsy 2001 jyldan beri ár eki jyl saıyn ótkizilip turady. Bıyl Abaı atyndaǵy Qazaq ulttyq opera jáne balet teatrynyń mereıtoılyq 90-ashylý maýsymynyń aıasynda ótkizildi.
Bıyl on ekinshi ret ótkizilip otyrǵan konkýrsqa 70-ten astam ótinish kelip, onyń 66-sy qatysty. Iaǵnı álemniń 11 elinen jas talanttar baqtaryn synady. Qazaqstannyń, Reseı, QHR, Chehıa, Lúksembýrg, Italıadan álemdik opera óneriniń maıtalmandarynan turatyn joǵary deńgeıdegi kásibı halyqaralyq qazylar alqasy qatysýshylardyń ónerine baǵa berip, úzdikterin anyqtady.