Búgin – 14 aqpan, Halyqaralyq kitap syılaý kúni
Búgin Sáýle Dosjanova óziniń jazǵan kitaptaryn Jambyl atyndaǵy Almaty qalasynyń jasóspirimder kitaphanasyna tartý etti, dep habarlaıdy Almaty-akshamy.kz.
Elimizde kitap syıǵa tartý kúni 2012 jyldan beri atalyp keledi. Negizi bul ataýly kúnniń shyǵýyna balalar kitaptary saıtynyń ıesi, úsh balanyń anasy Emmı Brodmýr atty AQSH-tyń turǵyny sebepker bolǵan eken. Ol birde balasy ekeýi áńgimelesip otyrǵanda: «Nege adamdardyń bir-birine eshqandaı sebepsiz kitap syılaıtyn kún joq?», - dep suraıdy balasy. Osydan keıin Emmı 2012 jyly 14 aqpan kúnin «Kitap syıǵa tartý kúni» retinde atalý usynysyn alǵa tartady. Kishkene balanyń usynysy osylaısha qoldaý taýyp, halyqaralyq deńgeıde atalyp keledi.
Shyndyǵynda, kitap - eń jaqsy syılyq! Biz bilim teńizine osy kitap arqyly júzip shyǵamyz. Kitap oqý arqyly sóz baılyǵymyz artyp, bilim kókjıegi keńeıedi. Sarqylmas aqyl alarymyz anyq. Sondyqtan jaqyndaryńyzǵa kitap syılańyzdar.
– Kitaphanada jastar kóp. Bilim alǵany kóńilimizdi kóteredi. Men de osynda otyryp, bir kitabymdy jazǵan bolatynmyn. Oqyrmandaryńyz kóp bolsyn! Jastarymyz bilimdi bolǵaı, - dedi Sáýle Dosjanova.
Ǵalymdardyń zertteýi boıynsha, kitap oqý streske qarsy jaqsy shara ekendigin kórsetken. Kitapty kóp oqyǵan saıyn mıdaǵy neırondyq baılanystar artta túsedi eken. Al dáriger mamandardyń aıtýynsha, kitap oqýdy ádetke aınaldyrý egde jasta aljymaýǵa, alsgeımer aýrýyna shaldyqpaýǵa septigin tıgizedi eken.